სახელისუფლებო და პრორუსული ჯგუფების კოორდინირებული “Vox Populi” ლევან ბერძენიშვილის წინააღმდეგ

22 იანვარს სახელისუფლებო სარედაქციო პოლიტიკის POS TV-ის ჟურნალისტმა ნათია ბერიძემ გაავრცელა ვიდეო, რომელშიც ის ფილოლოგ ლევან ბერძენიშვილს სიტყვიერ შეურაცხყოფას აყენებს. ბერიძე გაზიარებულ პოსტში წერს, რომ მან ვერ მოითმინა და ბერძენიშვილს სათქმელი უთხრა, რაც ქმნის შთაბეჭდილებას, რომ ის სპონტანურად მოქმედებდა. გავრცელებულ ვიდეოში ჩანს, რომ ერეკლე II-ის კრიტიკის გამო ის ერთ-ერთ შენობასთან ბერძენიშვილს არაკაცს უწოდებს და აღნიშნავს, რომ ამ სიტყვებს მთელი ქართველი ერის სახელით ამბობს.

სახელისუფლებო ექსპერტმა გია აბაშიძემ ნათია ბერიძის ვიდეო ფეისბუკის პირად ანგარიშზე 21 საათსა და 16 წუთზე, ბერიძს ვიდეოს გამოქვეყნებიდან ზუსტად 3 წუთში ატვირთა.  გია აბაშიძე პოსტში წერს, რომ ბერძენიშვილი “სადმე ნაცმედიაში მიზანმიმართულად დევნაში “სუსსა” და “ოცნების აქტივისტებს” დაადანაშაულებს,   სინამდვილეში კი ბერძენიშვილის წინააღმდეგ მიმართული კრიტიკა  Vox Populi (ხალხის ხმა) არის. 

აღსანიშნავია, რომ ფეისბუკზე ნათია ბერიძის ვიდეოს გავრცელებიდან (21:13) რამდენიმე წუთის შემდეგ (21:40) POSTV – ანალიტიკა-მ  ლევან ბერძენიშვილის შესახებ სიუჟეტი, სათაურით “ლევან ბერძენიშვილის სირცხვილის საგა” გამოაქვეყნა. სიუჟეტში ლევან ბერძენიშვილის როგორც პოლიტიკური, ასევე სამეცნიერო საქმიანობა ნეგატიურად იყო შეფასებული. სიუჟეტში ფრაზები ლევან ბერძენიშვილის ლექციებიდან კონტექსტიდან ამოგლეჯილი იყო, რაც ქმნიდა შთაბეჭდილებას, თითქოს ბერძენიშვილი ისტორიულ ფიგურებს, კლასიკოს მწერლებსა და ფეხბურთელ ხვიჩა კვარაცხელიას შეურაცხყოფს. სიუჟეტში აღნიშნული იყო ისიც, რომ “ბერძენიშვილს ამპარტავნება ქართველი ხალხის რისხვად დაუჯდა”, რის საილუსტრაციოდაც კახეთში ლევან ბერძენიშვილის საწინააღმდეგოდ გამართული პროტესტები იყო ნაჩვენები. თუმცა, მოგვიანებით PosTV-მ აღნიშნული სიუჟეტი წაშალა.

ნათია ბერიძის ვიდეო სოციალურ ქსელში როგორც ქართულ ოცნებასთან დაკავშირებულმა ანონიმურმა, ასევე კონსერვატიულ მოძრაობასა და “ალტ-ინფოსთან” დაკავშირებულმა ფეისბუკ ანგარიშებმა აიტაცეს.

“მითების დეტექტორის” მონიტორინგის შედეგად ლევან ბერძენიშვილის დისკრედიტაციის კამპანიაში ჩართული 12 ფეისბუკ გვერდი, 13 ფეისბუკ ჯგუფი,  4 ანონიმური ანგარიში, ასევე სახელისუფლებო სარედაქციო პოლიტიკის მქონე და სხვა ონლაინ მედიები გამოვლინდა:

• 12 ფეისბუკ გვერდიდან 3 ხელისუფლებასთან (ტერენტი გლდანელი, სირცხვილის კორიდორი, არ აგარევინებთ), 6 კი – ალტ-ინფო/კონსერვატიულ მოძრაობასთან არის დაკავშირებული (შოთა მარტინენკო, კონსერვატიული მოძრაობა ქარელში, კონსერვატიული მოძრაობა მარტვილში, ქართული გვერდი, პატრიოტული გვერდი, ალტ-სიახლე, ალტ სიახლე), 2 გვერდი კი ონლაინ გამოცემებს mix.metronome.ge-ის (პირველი ამბები) და tia.ge-ს ( •The best page in the world•) უკავშირდება;
• 13 ფეისბუკ ჯგუფიდან 7 “ქართულ ოცნებასთან” არის დაკავშირებული (მოქალაქე, ჩვენი მხარდაჭერა პრემიერმინისტრ ირაკლი ღარიბაშვილს, ბიძინა ივანიშვილი დადებითი და უარყოფითი, წინ საქართველო უკეთესი მომავლისკენ, კახა კალაძე – ქართული ოცნება, კახა კალაძე თბილისის მერი, ბიძინა ივანიშვილის მეგობრები ფეისბუკზე), 3 “კონსერვატიულ მოძრაობასა” და “ალტ-ინფოსთან” (ანტილიბერალური სივრცე, სამშობლოსთვის, ალტ-ინფო TV), 3 კი სხვადასხვა ონლაინ მედიასთან (თავისუფლება 🖤, აქ სიყვარულია, პროპაგანდა არანორმალური პროპაგანდის წინააღმდეგ);
• 4 ანონიმური ფეისბუკ ანგარიშიდან 3 (ეროვნული საქართველო, ორკ ესტრი, რამინიჩი ბნელიმოძალადე,) “ალტ-ინფოსთან”არის დაკავშირებული;
• ვიდეო 13-მა ონლაინ სააგენტომ გაავრცელა. მათ შორისაა სახელისუფლებო სარედაქციო პოლიტიკის მქონე (primetime.ge, tia.ge,  mpn.ge, timer.ge, split.spnews.io, digest.pia.ge, resonancedaily.com, mixmetronome.ge), ასევე პრორუსული (news-front) და სხვა (news.ge, newsline.ge, itar.ge, Newposts.ge) საინფორმაციო სააგენტოები. 

ფეისბუკ გვერდები

ნათია ბერიძის ვიდეო ხელისუფლების მხარდამჭერ და ოპონენტების მადისკრედიტირებელ ფეისბუკ გვერდებზე (ტერენტი გლდანელი, სირცხვილის კოროდორი, არ აგარევინებთ), გავრცელდა. ასევე, ვიდეო “კონსერვატიული მოძრაობის” ერთ-ერთმა ლიდერმა შოთა მარტინენკომ, ასევე ალტ-ინფოსა და “კონსერვატიულ მოძრაობასთან” დაკავშირებულმა გვერდებმა გაავრცელეს. ფეისბუკ გვერდის “არ აგარევინებთ” გამოქვეყნებული ვიდეო დასპონსორებულია,  თანხის გადამხდელად კი Davit Davitashvili არის მითითებული. 

ფეისბუკ ჯგუფები

ფეისბუკ ჯგუფების უმრავლესობა (7ჯგუფი),  სადაც ნათია ბერიძის ვიდეო გავრცელდა, “ქართულ ოცნებასთან” არის დაკავშირებული.

“ქართულ ოცნებასთან” დაკავშირებული ჯგუფები	“კონსერვატიულ მოძრაობასთან” დაკავშირებული ჯგუფები	მედიებთან დაკავშირებული ჯგუფები
მოქალაქე	ალტ-ინფო TV	თავისუფლება 🖤
ჩვენი მხარდაჭერა პრემიერმინისტრ ირაკლი ღარიბაშვილს	სამშობლოსთვის	აქ სიყვარულია
ბიძინა ივანიშვილი დადებითი და უარყოფითი	ანტილიბერალური სივრცე	პროპაგანდა არანორმალური პროპაგანდის წინააღმდეგ
წინ საქართველო უკეთესი მომავლისკენ
კახა კალაძე – ქართული ოცნება
კახა კალაძე თბილისის მერი
ბიძინა ივანიშვილის მეგობრები ფეისბუკზე

ანონიმური ანგარიშები

ნათია ბერიძის ვიდეო სოციალურ ქსელში ანონიმურმა ანგარიშებმაც გაავრცელეს. მათგან სამი “კონსერვატიული მოძრაობის” მხარდამჭერია.

ონლაინ მედიები

ნათია ბერიძის მიერ 22 იანვარს გამოქვეყნებული ვიდეო გაავრცელეს როგორც პრო-სახელისუფლებო სარედაქციო პოლიტიკის მქონე ონლაინ მედიებმა (primetime.ge tia.ge,  mpn.ge, timer.ge split.spnews.io, digest.pia.ge, resonancedaily.com, mixmetronome.ge), ასევე პრორუსულმა (news-front) და სხვა (news.ge, newsline.ge, itar.ge, Newposts.ge) საინფორმაციო სააგენტოებმაც. 

აღსანიშნავია, რომ ლევან ბერძელნიშვილი ბოლო დროს არაერთხელ გახდა ხელისუფლებასა და სხვა პრორუსულ ჯგუფებთან დაკავშირებული ჯგუფების მხრიდან შეურაცხყოფისა და თავდასხმის ობიექტი. 2023 წლის იანვარში ყვარლის “ევროკლუბში” ლევან ბერძენიშვილს 15 იანვარს ლექციის ჩატარების საშუალება არ მისცეს. მოგვიანებით, “ალტ-ინფოსთან” დაკავშირებული პარტიის, “კონსერვატიული მოძრაობის” თელავის ორგანიზაციამ დაადასტურა, რომ 15 იანვარს ყვარლის „ევროკლუბში“ ლევან ბერძენიშვილის მონაწილეობით დაგეგმილი ღონისძიება მათი ორგანიზებით ჩაიშალა. ადგილზე დაახლოებით 4 პოლიციელი იმყოფებოდა, თუმცა ლევან ბერძენიშვილის თქმით, სამართალდამცავებს არც კი უფიქრიათ მისი დარბაზში შეყვანა.

ვინ არის ნათია ბერიძე?

2020 წლის მაისში Facebook-მა კოკა ყანდიაშვილთან და Espersona-სთან დაკავშირებული გვერდები, ჯგუფები და პროფილები არაავთენტურ კოორდინირებულ ქცევაში ჩართულობის გამო წაშალა. “ესპერსონა”-ს ფეისბუქ გვერდი სოციალურ მედიაში სულ მცირე 14 ჯგუფს (არასრული სია) მართავდა, რომელთა შორისაც ერთ-ერთის  “ბიძინა ივანიშვილი ჩემი თანამოქალაქეა!” ადმინისტრატორი ნათია ბერიძე იყო. ნათია ბერიძე  2020 წლის დეკემბრამდე კოკა ყანდიაშვილის მიერ დაფუძნებული “ესპერსონას” ჟურნალისტი იყო და სწორედ ფეისბუკის მიერ “ქართულ ოცნებასთან” დაკავშირებულ გვერდებზე სანქციების დაწესების დღეს, 20 დეკემბერს დატოვა რედაქცია. ნათია ბერიძე ფიგურირებდა ტელეკომპანია “მთავარის” მიერ მომზადებულ სიუჟეტშიც, რომელიც სახელისუფლებო ტროლებს შეეხებოდა. 2021 წლიდან ნათია ბერიძე PosTV-ის ჟურნალისტია.