1 თებერვალს ყალბმა ფეისბუქ ანგარიშმა ბიწაძე ნანამ “ქართული ოცნების” თავმჯდომარის ირაკლის კობახიძის ფოტო გამოაქვეყნა, რომელსაც თან ერთვის შემდეგი ფრაზა: “ევროპა 25 წელი აწამებდა უდანაშაულოდ დაჭერილ გრაფ მონტე კრისტოს. ამიტომ მათ არ აქვთ უფლება, რომ სააკაშვილის უკანონო პატიმრობაზე ილაპარაკონ დღეს”. პოსტის ავტორი აღნიშნულ ფრაზას ირაკლი კობახიძეს მიაწერს.
1-2 თებერვალს კობახიძის ფოტო იდენტური წარწერით სხვა ფეისბუქ ანგარიშებმაც გაავრცელეს (1,2).
გავრცელებული ფრაზა გაყალბებულია, ღია წყაროებში ირაკლი კობახიძის მსგავსი ციტატა არ იძებნება.
გრაფი მონტე კრისტო (ედმონდ დანტესი) ალექსანდრ დიუმას ამავე სახელწოდების სათავგადასავლო რომანის მთავარი პერსონაჟია, რომელიც ციხეში უსამართლოდ გატარებული წლების შემდეგ თავის დაღწევას ახერხებს და იმ პირებზე აპირებს შურისძიებას, რომელთა გამოც ციხეში მოხვდა.
სააკაშვილის ლიტერატურულ პერსონაჟთან შედარება ქმნის შთაბეჭდილებას, რომ კობახიძეს გრაფი მონტე კრისტო ნამდვილი ადამიანი ჰგონია. 2 თებერვალს გავრცელებული პოსტის ავტორი თანდართულ აღწერაში კობახიძეს “არასრულფასოვნების კომპლექსის” მქონე პოლიტიკოსს უწოდებს და სვამს კითხვას პოლიტიკოსს დიპლომი ბაბუამ ხომ არ უყიდა.
რეალურად, ირაკლი კობახიძეს ინტერვიუებსა და საჯარო გამოსვლებში მსგავსი ფრაზა არ გაუჟღერებია. სააკაშვილის საკითხის შესახებ მმართველი პარტიის ლიდერს არაერთი განცხადება აქვს გაკეთებული. მისი ბოლოდროინდელი განცხადებების მიხედვით, მიხეილ სააკაშვილი არის აგენტი, რომელიც კონტეინერში მოათავსეს და საქართველოში გამოუშვეს და მისი შეწყალება პრეზიდენტის მხრიდან ქართული სახელმწიფოს წინააღმდეგ გადადგმული ნაბიჯი იქნება.
ყოფილი პრეზიდენტის შესახებ გაკეთებულ უკანასკნელ განცხადებაში ირაკლი კობახიძე აღნიშნავს, რომ სახელმწიფო პასუხისმგებელია ყველა პატიმარს, მათ შორის სააკაშვილს, ყველა შესაბამისი სამედიცინო თუ სხვა მომსახურება მიაწოდოს, ხოლო პატიმრის ოჯახი და საახლობლო წრე პასუხიმგებელია მას სათანადო კალორაჟის საკვები შეუტანოს.
წყაროს შესახებ:
ყალბი ფეისბუქ ანგარიში ბიწაძე ნანა ხელისუფლების წევრების მადისკრედიტირებელ პოსტებს აქვეყნებს (1,2). 2020 წელს აღნიშნული ფეისბუქ ანგარიში გვერდმა ვინ ვინ არის – Vin Vin Aris შეისწავლა და დაადგინა, რომ ის ფეისბუქ პროფილი Альона Тимончук-ის ფოტოებს იპარავს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
