EUvsDisinfo-ს მასალის მიხედვით
კრემლის კონტროლირებული მედია დეზინფორმაციული ნარატივებითა და პრო-პეკინური გაშუქებით ჩინეთის ხელისუფლებას კორონავირუსთან დაკავშირებული კრიტიკის წინააღმდეგ აქტიურად იცავს.
20 აპრილს Россия 24-ის ეთერში ევროკავშირის სანქცირებულმა ტვ წამყვანმა დიმიტრი კისილოვმა განაცხადა, რომ დასავლეთი ჩინეთს COVID-19-თან ბრძოლაში უსაფუძვლოდ აკრიტიკებს. მან ეს კრიტიკა შეადარა სკრიპალების საქმეს და 2016 წლის ამერიკის შეერთებული შტატების საპრეზიდენტო არჩევნებში ჩარევის ბრალდებებს, რომლებზეც, კისილოვის მტკიცებით, რუსეთს განგებ აკისრებდნენ პასუხისმგებლობას. დიმიტრი კისილოვის განცხადებით, არ არსებობს მტკიცებულება, რომ ახალი კორონავირუსი უხანის ლაბორატორიიდან გაიპარა, ისევე როგორც არ არსებობს ნივთმტკიცებები, რომ აშშ-ის საპრეზიდენტო არჩევნებში ჩარევა ან სკრიპალების მოწამვლა რუსეთს უკავშირდება.
აღნიშნული ნარატივი, რომელშიც რუსეთის ხელისუფლება ბრალს არ აღიარებს კრემლის დეზინფორმაციული კამპანიის ნაწილია. სინამდვილეში მოიპოვება იმის საფუძვლიანი მტკიცებულებები, რომ აშშ-ის საპრეზიდენტო არჩევნებში ჩარევასა და სკრიპალების საქმეში დამნაშავე რუსეთია.
პრო-პეკინურ მესიჯებს ავრცელებენ სახელმწიფოს კონტროლირებული ახალი ამბების სააგენტოები РИА Новости და RT-ც. РИА Новости სტატიებს აქვეყნებდა შემდეგი სათაურებით:
- “ჩინური მედია აქარწყლებს მითებს COVID-19-ის შესახებ”
- “იმისათვის, რომ გადარჩეს, ამერიკა ჩინეთი უნდა გახდეს”
- “ჩინეთმა დააფასა რუსეთის მიდგომა კორონავირუსის წარმოშობის მიმართ”
- “[რუსეთის] საგარეო საქმეთა სამინისტრო გმობს პანდემიის ჩინეთსა და WHO-ზე გადაბრალების მცდელობებს”.
პრო-პეკინური მესიჯები ქვეყნდებოდა Russia Today-ს ინგლისურენოვან პორტალზეც:
- “რას მალავს აშშ? პეკინი ვაშინგტონის რეაგირებას COVID-19-ზე და ჩინეთისთვის ბრალის წაყენების ‘სასოწარკვეთილ’ მცდელობებს აკრიტიკებს”
- “ჩარევა ‘ვერ გაამართლებს’: პეკინი აკრიტიკებს პომპეოს ბრალდებას სამხრეთ ჩინეთის ზღვაში გავლენის გაზრდის მიზნით COVID-19-ის კრიზისის გამოყენებაზე”
- “ჩინეთი არის მსხვერპლი და არა COVID-19-ზე დეზინფორმაციის შემოქმედი”
- “პეკინი კორონავირუსთან გამკლავების საკითხზე ავსტრალიის ‘უსაფუძვლო კითხვებს’ უარყოფს”
კრემლის ნარატივი ნათელია: მოსკოვი და პეკინი, ორივე ერთ ბედქვეშ დასავლეთის უსამართლო ბრალდებების მსხვერპლნი არიან.
