23 თებერვალს ფეისბუქ ანგარიშმა “პუტინისტური დაჯგუფება” ვარდისფერი ტანკის და მასზე მყოფი ადამიანების ფოტო გამოაქვეყნა. ფოტოს აღწერის მიხედვით, აშშ-მ უკრაინას “სამხედრო დახმარების სახით LG-BTR” გადასცა.
ფოტოს აღწერა ყალბია. რეალურად, ფოტო არა აშშ-ს მიერ უკრაინისთვის გადაცემულ სამხედრო ტექნიკას, არამედ 2005 წელს ქალაქ ბრაიტონის პრაიდზე Amnesty International-ის გამოსვლას ასახავს.
ფოტო 2005 წლის 6 აგვისტოს დიდ ბრიტანეთში ქალაქ ბრაიტონის პრაიდზეა გადაღებული.
ვარდისფერად შეღებული ტანკითა და მოწოდებით “სიყვარული ადამიანის უფლებაა, დაიცავით ადამიანი” მარშზე საერთაშორისო ორგანიზაცია Amnesty International-ი წარსდგა.
ორგანიზაცია მსველობაში ვარდისფერი ტანკით 2005 წელს ლონდონშიც მონაწილეობდა.
აღსანიშნავია, რომ რუსეთის მხრიდან სამხედრო აგრესიის გაზრდილი საფრთხის გამო 2022 წლის იანვარში აშშ-მ უკრაინას 90 ტონა სამხედრო შეიარაღება გადასცა. გასულ წელს კი საერთო ჯამში აშშ უკრაინას 650 მილიონი დოლარის ღირებულების შეიარაღებით დაეხმარა.
ლგბტქ+ საკითხებით უკრაინისა და აშშ-ს არმიების დისკრედიტაციის მიზნით დეზინფორმაციები “მითების დეტექტორმა” ადრეც გადაამოწმა, ვრცლად იხილეთ:
- რა აკავშირებთ “ალტ-ინფოს”, ლუგანსკელ АНДРЕЙ ВИТАЛЬЕВИЧ МАРОЧКО-ს და ქართველ კონსერვატორებს გაყალბებულ ფილმთან?
- უკრაინის სამხედრო ძალები თუ ბრიტანული ფილმი თანასწორობაზე – ვინ გააყალბა ვიდეო?
წყაროს შესახებ
ფეისბუქ ანგარიში “პუტინისტური დაჯგუფება” ალტ-ინფოსთან და პარტია “კონსერვატიულ მოძრაობასთანაა” დაკავშირებული. ჩვენს შესახებში მითითებული აქვს, რომ სწავლობდა КГБ-ში. ანგარიში უმეტესად ანტიდასავლურ და ალტ-ინფოსა და კონსერვატიული მოძრაობის მხარდამჭერ პოსტებს აქვეყნებს და ათობით სხვა ფეისბუქის ანგარიშის მონიშვნოთ ინფორმაციის გავრცელებას ცდილობს.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
