27 აპრილს რუსულენოვანმა ფეისბუკ-ანგარიშებმა (1, 2 ) გაავრცელეს ვიდეო, რომელშიც პოლონეთის პოლიციის მანქანაზე „Z” სიმბოლოა გამოსახული. პოსტის ავტორები წერენ, რომ უკრაინელებმა პოლონელები იმდენად გააღიზიანეს, საპასუხოდ პოლიციის მანქანებზე „Z” სიმბოლო გამოჩნდა. მანამ, სანამ პოლონეთის მთავრობა რუსეთის წინააღმდეგ სანქციებს ალაგებს, პოლონეთის პოლიცია უკრაინაში სპეცოპერაციის ჩატარებას მხარს უჭერს.
მტკიცება, თითქოს Z სიმბოლო პოლონეთის პოლიციის მანქანებზე რუსეთის მხარდაჭერას გამოხატავს, დეზინფორმაციაა. რეალურად, ვიდეოში პოლონეთის პოლიციის მანქანაზე გამოსახულ Z სიმბოლო კონკრეტული რეგიონის დანაყოფს აღნიშნავს. ამ შემთხვევაში კი Z უშუალოდ ვარშავის პოლიციის შტაბის ნიშანია და მათ ყველა მანქანაზეა გამოსახული.
ვარშავის პოლიციის შტაბის ფეისბუკ-გვერდზე ბევრი ფოტოა, რომელშიც მანქანაზე Z სიმბოლოა გამოსახული.
ვარშავის პოლიციის შტაბი – პოლიციის ორგანიზაციული ერთეულია, რომელიც ვარშავასა და მის ირგვლივ მდებარე ცხრა რაიონს მოიცავს. ესენია: გროჯისკი, ლეგიონოვსკი, მინსკი, ნოვოდვორსკი, ოტვოცკი, პიასეჩინსკი, პრუშკოვსკი, ვარშავსკი ზახოდნი და ვოლომინსკი. ვარშავის პოლიციის შტაბის სხვა დანაყოფებისგან განმასხვავებელი ნიშანი სწორედ Z სიმბოლოა, სხვა რეგიონები კი სხვა სიმბოლოთი აღინიშნება.
მაგალითად, ქვემო სილესიის სავოევოდოს პოლიციის განმასხვავებელი სიმბოლოა B,BB, ვიელკოპოლსკის სავოევოდოსი კი U,UU. შესაბამისად, პოლონეთში პოლიციის მანქანების გარჩევა ამ სიმბოლოებითაც არის შესაძლებელი.
ჯგუფებში გამოქვეყნებული ვიდეო TikTok-ის ანგარიშიდან არის აღებული. ვიდეოს ავტორს აღწერაში უწერია, რომ ეს ხუმრობაა.
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.