26 აპრილს ფეისბუქ მომხმარებელმა ქაროსა ნი ადამიანთა ცეკვის ამსახველი ვიდეო გამოაქვეყნა. ვიდეოს თან ერთვის რუსულენოვანი წარწერა: “ბერლინში მწოლიარე ცხედრები ადგდნენ. გაუპატიურებული და მოკლული უკრაინელი ქალები ნასვამ მდგომარეობაში”, რაც ქმნის შთაბეჭდილებას, რომ საუბარია ბერლინში მყოფ უკრაინელებზე. დამატებით “ქაროსა ნი” პოსტში აღნიშნავს, რომ პროუკრაინულ აქციაში მონაწილეები ცხედრებს განასახიერებდნენ, შემდეგ კი ცეკვა დაიწყეს.
გავრცელებული ინფორმაცია, თითქოს აქციაში მონაწილე უკრაინელები ცხედრებს განასახიერებდნენ, შემდეგ კი ცეკვავდნენ, მცდარია. აღნიშნული აქცია-პერფორმანსი ვილნიუსში ლიეტუველი არტისტების ორგანიზებით გაიმართა, რომელიც 2022 წლის საფრანგეთის საპრეზიდენტო არჩევნებსა და უკრაინის მხარდაჭერას ეხებოდა.
აქცია-პერფორმანსი, რომელსაც გავრცელებულ ვიდეოში ვხედავთ 22 აპრილს ვილნიუსში, ე.წ “ფრანგულ პარკში” გაიმართა.
აქციის ორგანიზატორებსა და მონაწილეებს შორის ლიეტუველი მუსიკოსები, მხატვრები, ფოტოგრაფები და სტუდენტები იყვნენ. მათი განმარტებით, აქცია 24 აპრილის მოახლოებასთან დაკავშირებით გაიმართა, რომელიც ორი მნიშვნელოვანი მოვლენის – უკრაინაში რუსეთის შეჭრიდან ორი თვის გასვლის და საფრანგეთის საპრეზიდენტო არჩევნების მეორე ტურის თარიღია.
პერფორმანსს “France in Trance” ეწოდა და იდეის ავტორის, პაულე ბოკულაიტეს განცხადებით, სასმელი, რომელსაც პერფორმანსის მონაწილეები სვამდნენ სისხლს განასახიერებდა, რომელსაც უკრაინა დემოკრატიული ფასეულობების დასაცავად ღვრის, ზოგიერთ ქვეყანაში კი, რომლებიც ამ ღირებულებებს აღიარებენ, უკრანაში მიმდინარე გენოციდის ფონზე მხოლოდ ეკონომიკური პირობების გაუარესება ადარდებთ.
პერფორმანსის კიდევ ერთი მიზანი საფრანგეთის არჩევნებში მარინ ლე პენის შესაძლო გამარჯვების გაპროტესტება იყო, რომელსაც აქციის მონაწილეები “კრემლთან დაკავშირებულ ჰომოფობ პოპულისტს” უწოდებენ.
ეს ლიეტუველი არტისტების მიერ უკრაინის მხარდასაჭერად გამართული ერთადერთი აქცია არ ყოფილა, აღნიშნული პერფორმანსის შემდეგ ლიეტუველმა ხელოვანებმა უკრაინის მხარდასაჭერად კვირეულიც დაგეგმეს.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.