1 ოქტომბერს საინფორმაციო სააგენტო kvira.ge-მ გამოაქვეყნა ინფორმაცია, სათაურით “ჟირინოვსკი – სააკაშვილს: შენს გასათავისუფლებად ყველა ზომას მივმართავთ”. kvira.ge-ს სტატია 2 ოქტომბერს გააზიარა ქართული ოცნების მხარდამჭერმა გვერდმა “ლიდერი 41”, რომელმაც პოსტში აღნიშნა, რომ მიხეილ სააკაშვილი რუსეთის აგენტია, ხოლო რუსეთის ლიბერალ-დემოკრატიული პარტიის ლიდერი ვლადიმირ ჟირინოვსკი კი ვლადიმირ პუტინს ახმოვანებს.
kvira.ge-ს პოსტი კომენტარის გარეშე სხვადასხვა ფეისბუქ საჯარო ჯგუფში გადაზიარდა, რამაც მკითხველის ნაწილში შექმნა შთაბეჭდილება, რომ ჟირინოვსკი სააკაშვილს მხარს უჭერს და მის დახმარებას აპირებს. ფეისბუქ ჯგუფებში ინფორმაციის ერთ-ერთი გამზიარებელი იყო სამთავრობო ექსპერტი გია აბაშიძე, რომელმაც kvira.ge-ს მასალის გავრცელება, მისი გამოქვეყნებიდან მალევე დაიწყო. Crowdtangle-ის მონაცემებით kvira.ge-ს მასალა 5 ფეისბუქ ჯგუფსა და 2 ფეისბუქ გვერდზე გავრცელდა.
არჩევნების დღეს 2 ოქტომბერს kvira.ge-ს სტატია დავით რაზმაძემ, 2017-2021 წლებში გორის მუნიციპალიტეტის საკრებულოს თავმჯდომარემ და მიმდინარე არჩევნებში ქართული ოცნების სიის პირველმა ნომერმა კომენტარის გარეშე გააზიარა, რაც საზოგადოების მხრიდან სხვდასხვაგვარად იქნა აღქმული. სტატიას აზიარებდნენ “ქართული ოცნების” მხარდამჭერებიც.
ჟირინოვსკის განცხადება გამოქვეყნდა gtmedia.ge-ზეც, რომელიც გაზიარდა ფეისბუქ ჯგუფში “ქართველები”. კომენტარებიდან ჩანს, რომ მიხეილ სააკაშვილს აღნიშნული განცხადების გამო რუსეთის მოკავშირედ აღიქვამენ.
ჟირინოვსკის განცხადება მიხეილ სააკაშვილის დაკავებასთან დაკავშირებით რეალური, თუმცა სარკასტულია. კომენტარის გარეშე ინფორმაციის კოორდინირებული გავრცელება შეცდომაში შემყვანია, აქცენტი კეთდება სათაურზე “ჟირინოვსკი – სააკაშვილს: შენს გასათავისუფლებად ყველა ზომას მივმართავთ” და ქმნის შთაბეჭდილებას, რომ ვლადიმირ ჟირინოვსკი მიხეილ სააკაშვილის მხარდამჭერ განცხადებას აკეთებს და მისი პატიმრობიდან გათავისუფლება სურს.
2021 წლის 1 ოქტომბერს ვლადიმერ ჟირინოვსკიმ Telegram-ის საკუთარ არხზე მიხეილ სააკაშვილის დაპატიმრებასთან დაკავშირებით პოსტი გამოაქვეყნა. ჟირინოვსკი პოსტს ირონიით აქვეყნებს, ინფორმაცია ქართულ მედიაში ინტერპრესნიუსმაც გააშუქა. ინტერპრესნიუსის სტატიაში აღნიშნულია, რომ ჟირინოვსკი პოსტს სარკასტულად წერს. kvira.ge-ს და gtmedia.ge-ს მასალებში ჟირინოვსკის პოსტის სარკასტული ხასიათის შესახებ არაფერია ნათქვამი, ხოლო “ქართული ოცნების” წევრებისა და მხარდამჭერების მიერ ამ ინფორმაციის გაზიარებამ მკითხველში შექმნა შთაბეჭდილება, რომ ჟირინოვსკი და სააკაშვილი მოკავშირეები არიან.
პოსტში ჟირინოსვკი წერს:
“სააკაშვილის დაკავების საკითხზე.
მიშიკო, რატომ წახვედი თბილისში? რატომ არ მოხვედი მოსკოვში? ჩვენ ЛДПР ყველა ზომას მივიღებთ თქვენი გათავისუფლებისთვის. თუმცა მანამდე, მიშა, გაუძელი. მე ვიცი, რა მენიუ მოამზადა საქართველოს ხელისუფლებამ თქვენი ჩამოსვლისთვის: დამპალი თევზის კუდების წვნიანი, კარტოფილის ნარჩენების პიურე და პირველი მსოფლიო ომის დროინდელი ფხვნილის კისელი.
და გაიხსენე, როგორ კარგად ჭამდი … მაგრამ, როგორც ჩანს, დაგავიწყდა ერთი კარგი სიმღერა: «Ешь ананасы, рябчиков жуй – день твой последний приходит, буржуй!» ეს არის შენი დასასრული, მიშა.
შეგეძლო მშვიდად გეცხოვრა მოსკოვში, შევხვედროდი იანუკოვიჩს, ნარდი გეთამაშა ძველი არბატის ქუჩაზე, მაგრამ შენ გადაჭარბებულმა სიხარბემ შეგაწუხა.
მაგრამ ЛДПР შენთანაა, ჩვენ გადაგარჩენთ!”
ჟირინოვსკის კომენტარი რუსულ მედიაშიც გავრცელდა და აღინიშნა, რომ რუსი პოლიტიკოსი სააკაშვილის დაკავებას ხუმრობით ეხმიანება. 1 ოტომბერს სტატიები შემდეგ გამოცემებში დაიწერა:
- ria.ru– Жириновский отшутился на тему задержания Саакашвили (ჟირინოვსკიმ სააკაშვილის დაკავების თემაზე იხუმრა)
- lenta.ru- Жириновский обратился к Саакашвили фразой «Вот и конец твой, Миша» (ჟირინოვსკი სააკაშვილს მიმართავს ფრაზით “ეს არის შენი დასასრული, მიშა”)
- Mk.ru– Жириновский в шутку пообещал принять все меры к освобождению Саакашвили (ჟირინოვსკი ხუმრობით პირდება, რომ ყველა ზომას მიიღებს სააკაშვილის გასათავისუფლებლად)
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
