რუსეთის სახელმწიფო ტელევიზია, Россия-1-თან ინტერვიუში რუსეთის პრეზიდენტმა ვლდიმირ პუტინმა თქვა, რომ უკრაინელების სულ მცირე 50%-ს NATO-ში შესვლა არ სურს .
ვლადიმირ პუტინი, რფ პრეზიდენტი: უკრაინის მოქალაქეების მინიმუმ 50%-ს არ სურს ქვეყნის ნატოში შესვლა. ეს ჭკვიანი ხალხია. ამას ირონიის გარეშე ვამბობ. არა იმიტომ, რომ სხვები სულელები არიან. არამედ იმიტომ, რომ მათ, ვისაც არ სურთ [ნატოში შესვლა] ესმით, რომ მათ არ სურთ ცეცხლის ხაზზე ყოფნა. არ სურთ იყონ საზარბაზნე ხორცი.
ვლადიმირ პუტინის განცხადება მანიპულაციურია. რეალურად, უკანასკნელი კვლევის მიხედვით, უკრაინის მოსახლეობის 48% მხარს უჭერს ნატოში გაწევრიანებას, წინააღმდეგი კი მხოლოდ 28%-ია.
რუსეთის პრეზიდენტის, ვლადიმირ პუტინის განცხადება, რომ უკრაინის მოქალაქეთა მინიმუმ 50%-ს ნატოში გაწევრიანება არ სურს, მანიპულაციურია. ერთ-ერთი ბოლო კვლევა ამ საკითხზე 2021 წლის მარტში საერთაშორისო რესპუბლიკურმა ინსტიტუტმა (IRI) გამოაქვეყნა. კითხვაზე, “ხვალ რომ რეფერენდუმი ჩატარდეს უკრაინის ნატოში გაწევრიანებაზე, რას მისცემდით ხმას?” პასუხები კი ასე გადანაწილდა:
- 48% – ხმას მისცემდა უკრაინის ნატოში გაწევრიანებას
- 28% – ხმას მისცემდა ნატოში გაწევრიანების წინააღმდეგ
- 13% – პასუხის გაცემა უჭირს/პასუხი არ აქვს
- 11% – რეფერენდუმში მონაწილეობას არ მიიღებდა.
მანიპულაციურია მტკიცება, რომ ბოლო ორი კატეგორიის წარმომადგენლებს, გამოკითხულთა 23%-ს ნატოში გაწევრიანება არ სურთ.
ამაზე მიუთითებს კიდევ ერთ გამოკითხვა, რომელიც მიმდინარე წლის აპრილში უკრაინულმა ინსტიტუტმა მომავლისათვის (UIF) New Image Marketing Group-თან ერთად ჩაატარა. გამოკითხვის შედეგები ასეთია:
- 43% – სრულად უჭერს მხარს ნატოში გაწევრიანებას
- 21% – ნაწილობრივ უჭერს მხარს ნატოში გაწევრიანებას
- 7% – ნაწილობრივ ეწინააღმდეგება ნატოში გაწევრიანებას
- 12% – სრულად ეწინააღმდეგება ნატოში გაწევრიანებას.
აღსანიშნავია, რომ რუსეთის მიერ ყირიმის უკანონო ანექსიამდე და აღმოსავლეთ უკრაინაში სეპარატისტების მხარდაჭერამდე, სხვადასხვა ინსტიტუტების მიერ ჩატარებულ გამოითხვებში ნატოში გაწევრიანების მოწინააღმდეგეთა პროცენტული მაჩვენებელი 50%-ს მართლაც აღემატებოდა. მაგალითისათვის 2009 წელს, Pew Research Center-ის მიერ ჩატარებული გამოკითხვის მიხედვით, 51% ნატოში გაწევრიანების წინააღმდეგი იყო, მომხრე კი – 28%.
თუმცა, 2014 წლის შემდეგ ნატოში გაწევრიანების მომხრეთა რაოდენობა გაიზარდა. IRI-ს კვლევაში მოცემულია გასულ წლებში ამავე კითხვაზე მიღებული პასუხების პროცენტული მაჩვენებლები, საიდანაც ჩანს, რომ ნატოში გაწევრიანების მოწინააღმდეგეთა მაქსიმალური რაოდენობა 2014 წლის მარტში, რუსეთის მიერ ყირიმის ანექსიის დაწყებიდან ერთი თვის შემდეგ 43% იყო, მას შემდეგ კი 40%-ს არ აღემატება.