20 მაისს სახელისუფლებო სარედაქციო პოლიტიკის მქონე მედია ,,POSTV – ანალიტიკამ” ფეისბუქზე ამავე დღის საპროტესტო მსვლელობისთვის შეკრებილი სტუდენტების ფოტო გამოაქვეყნა. მედია პროტესტის მონაწილეთა რაოდენობაზე მიუთითებს და პოსტში წერს, რომ ,,სტუდენტების დღევანდელ აქციას 48 ახალგაზრდა ესწრებოდა”.
POSTV ფოტომანიპულაციას ავრცელებს და არ უთითებს, რომ ფოტოზე აღბეჭდილი ადამიანები საპროტესტო მსვლელობის მხოლოდ ერთი ჯგუფია და ფოტო მსვლელობის დაწყებამდეა გადაღებული. სტუდენტები მსვლელობებს სხვადასხვა ადგილიდან იწყებენ და საბოლოოდ, ერთიან მსვლელობებს აგრძელებენ.
20 მაისს ე.წ. აგენტების კანონის წინააღმდეგ თბილისში სტუდენტების საპროტესტო მსვლელობა მოეწყო. სხვადასხვა უნივერსიტეტის სტუდენტები სამედიცინო უნივერსიტეტთან და წერეთლის მეტროსთან შეიკრიბნენ, ერთმანეთს სააკაძის მოედანზე შეუერთდნენ, გმირთა მოედანზე მივიდნენ და მსვლელობა პარლამენტის შენობის წინ დაასრულეს.
POSTV-ის მიერ გავრცელებული ფოტოზე სამედიცინო უნივერსიტეტის სტუდენტები არიან. ტელეკომპანია ,,ფორმულას” მიერ გავრცელებულ ვიდეოში ვხედავთ, რომ სამედიცინო უნივერსიტეტიდან დაწყებულ მსვლელობას მიუძღვებიან იგივე სტუდენტები, რომლებიც POSTV-ის ფოტოზე ჩანან.
წერეთლის მეტროსთან შეკრებილი სხვადასხვა უნივერსიტეტის სტუდენტები სააკაძის მოედანზე შეუერთდნენ სამედიცინო უნივერსიტეტიდან წამოსულ სტუდენტებს და ერთად განაგრძეს მსვლელობა.
20 მაისს, სტუდენტების საპროტესტო მსვლელობის პარალელურად, პარლამენტის შენობის წინ ე.წ. ,,აგენტების კანონის” გასაპროტესტებლად შეკრებილი იყვნენ დამამთავრებელი კლასის მოსწავლეები და კანონის სხვა მოწინააღმდეგეები.
სამთავრობო მედია POSTV-მ ,,აგენტების კანონის” საწინააღმდეგო პროტესტის დისკრედიტაციის მიზნით არაერთი შეცდომაში შემყვანი ცნობა გაავრცელა. ,,მითების დეტექტორმა” უკვე არაერთი მათგანი გამოავლინა. ვრცლად მასალები:
- სამთავრობო მედიები ნანკა კალატოზიშვილის ვიდეოს მანიპულაციურად ავრცელებენ
- ვინ არის პატრიკ ჰერნანდესი, რომლის დაკავებასაც აშშ-ის შესახებ კონსპირაციის გასავრცელებლად იყენებენ
- POSTV მოძრაობა ,,ჯიუტის” შესახებ დეზინფორმაციას ავრცელებს
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
