3 ივნისს ანონიმურმა ფეისბუქ ანგარიშმა მე ამბოხე ტელეგრამის მესიჯის სქრინშოტი გამოაქვეყნა, რომელზეც ორ ფოტოსა და რუსულენოვან ტექსტს მოიცავს. ერთ ფოტოზე პლაჟზე მწოლ შიშველ ქალს ვხედავთ, ხოლო მეორეზე – უკრაინის პირველ ლედის, ოლენა ზელენსკას. რუსულენოვანი აღწერის მიხედვით, პირველი ფოტო 2023 წლის 25 აპრილს ისრაელში, ნუდისტურ პლაჟზეა გადაღებული და მასზე ზელენსკაა გამოსახული, რომელიც ისვენებს, სანამ მისი ქმარი “ევროპაში იარაღს იხვეწება”.
ინფორმაცია, რომ ოლენა ზელენსკა ისრაელში, ნუდისტურ პლიაჟზე ისვენებს, მცდარია. გავრცელებულ ფოტოზე არა ოლენა ზელენსკა, არამედ რუსი ტელეწამყვანი ელენა ლენინაა გამოსახული.
ფეისბუქზე გავრცელებული ფოტო მსგავსი აღწერით ჯერ კიდევ 2022 წლის ოქტომბერში გამოჩნდა და ის ფაქტების გადამოწმების ორგანიზაცია AFP-მა გადაამოწმა. ამ შემთხვევაშიც, ფოტოს აღწერაში გვხვდებოდა მტკიცება, რომ ზელენსკა ისრაელში ისვენებდა.
რეალურად, ფოტოზე არა ოლენა ზელენსკა, არამედ რუსი ტელეწამყვანი ელენა ლენინაა ასახული. აღნიშნული ფოტო ტელეწამყვანის ამავე ლოკაციაზე გადაღებულ სხვა ფოტოებთან ერთად არაერთ რუსულენოვან საიტზეა ხელმისაწვდომი (1,2,3).
2023 წლის აპრილის ბოლოს ოლენა ზელენსკა უკრაინაში იმყოფებოდა. ამ პერიოდში მისი ისრაელში ვიზიტის შესახებ ინფორმაცია ღია წყაროებში არ იძებნება. 26 აპრილს ზელენსკა მეფე ჩარლზ III-სთან და დედოფალ კონსორტ კამილასთან ერთად ბრიტანული და უკრაინული ბიბლიოთეკების დამეგობრების ცერემონიაში მონაწილეობდა. ზელენსკა ღონისძიებას კიევიდან ჩაერთო (1,2).
ეს უკრაინის პირველი ლედის დისკრედიტაციის მიზნით ვიზუალური მანიპულაციის გამოყენების პირველი შემთხვევა არაა. ვრცლად ზელენსკას გაყალბებული ფოტოების შესახებ იხილეთ “მითების დეტექტორის” მასალებში:
- დეზინფორმაცია, თითქოს ჰაკერებმა ოლენა ზელენსკას პირადი ცხოვრების ამსახველი ფოტო გაავრცელეს
- ოლენა ზელენსკა თუ მილიონერი რიჩარდ ჰართი – ვინაა გამოსახული გაყალბებულ ფოტოზე?
წყაროს შესახებ:
ფეისბუქ ანგარიში მე ამბოხე ანტიოპოზიციური და ანტიდასავლური შინაარსის პოსტებს, მათ შორის, მცდარ ინფორმაციას, რეგულარულად ავრცელებს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
