2023 წლის 16 მაისს, Facebook-ის რუსულენოვანმა მომხმარებელმა უკრაინის პრეზიდენტი ვოლოდიმირ ზელენსკის, ევროპული საბჭოს პრეზიდენტი, შარლ მიშელისა, და ევროკომისიის პრეზიდენტი, ურსულა ფონ დერ ლაიენის, ერთობლივი ფოტო გამოაქვეყნა. ფოტოზე ლიდერები სამი ხელისა და მამაკაცის სასქესო ორგანოს მქონე ქალის ქანდაკების ფონზე არიან გამოსახული. რუსულენოვანმა მომხმარებელმა ფოტო შემდეგი აღწერით გამოაქვეყნა: „ევროპული ღირებულებები ერთ ფოტოში.“
ზელენსკის, შარლ მიშელისა და ურსულა ფონ დერ ლაიენის გავრცელებული ფოტო პროგრამულადაა დამუშავებული. ფოტოს ავთენტურ ვერსიაში ხსენებული ლიდერები უკრაინისა და ევროკავშირის დროშების ფონზე არიან გამოსახული.
2023 წლის 3 თებერვალს, ევროკავშირი-უკრაინის 24-ე სამიტის ფარგლებში, ვოლოდიმირ ზელენსკიმ ევროპული საბჭოს პრეზიდენტ შარლ მიშელსა და ევროკომისიის პრეზიდენტ ურსულა ფონ დერ ლაიენს კიევში უმასპინძლა. ფოტო სწორედ მოცემული შეხვედრის დროსაა გადაღებული.
შეხვედრისას ზელენსკიმ მადლობა გადაუხადა ლიდერებს ევროკავშირის მიერ უკრაინისთვის ბოლო ერთი წლის მანძილზე გაწეული მხარდაჭერისთვის და ისაუბრა იმ პროგრესზე, რაც უკრაინამ ევროკომისიის შვიდი რეკომენდაციის შესრულების პროცესში გასწია. უკრაინის პრეზიდენტმა ასევე მადლობა გადაუხადა მიშელსა და ფონ დერ ლაიენს რუსეთის სრულმასშტაბიანი აგრესიის მიუხედავად კიევში ჩასვლისთვის.
ვოლოდიმირ ზელენსკი: „სირენის მიუხედავად, მინდა მადლობა გადაგიხადოთ, რომ ამ ხმების არ გეშინიათ და ამ ომში ჩვენთან ერთად სიკეთის მხარეს დგახართ..”
რაც შეეხება ფოტოს დამუშავებულ ვერსიაში გამოსახულ ქანდაკებას, იგი რეალურად ჰოლანდიაში, ჰააგაში მდებარეობს. ნამუშევარი სახელწოდებით “And Life is Over There” [ცხოვრება იქ არის] 2017 წელს შეიქმნა და ჰოლანდიელ ხელოვან Femmy Otten-ს ეკუთვნის.
ხელოვანის თქმით, ქანდაკება სხვადასხვა სქესისა და ხელოვნების სტილის ელემენტებს აერთიანებს. მაგალითად, ლომისმაგვარი პატარა არსება ქანდაკების თავზე ეგვიპტურ ქალღმერთს წააგავს, ხოლო მისი ღიმილი კლასიკურ ბერძნულ ქანდაკებებთან ასოცირდება. ხელოვანის თქმით, ნამუშევარი მიზნად ისახავს აწმყოსა და წარსულის, სიმბოლოებისა და რეალობის შერწყმას ისევე მარტივად, როგორც ამას ორი სქესი ახერხებს, რაც საბოლოოდ აზროვნების თავისუფლებას განასახიერებს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
