21 ნოემბერს სოციალურ ქსელში საქართველოს მესამე პრეზიდენტის მიხეილ სააკაშვილის მამის, ნიკოლოზ სააკაშვილის ვიდეო გავრცელდა (1,2), რომელიც TV პირველის გადაცემაში “დღის ამბები” მისი სტუმრობის ფრაგმენტს წარმოადგენს. ვიდეოში ჩანს, რომ რესპონდენტი ტელეწამყვან მაია მამულაშვილის შეკითხვას თავდახრილი ისმენს, ამავე დროს კადრს ხვრინვის ხმა ერთვის, რაც ქმნის შთაბეჭდილებას, რომ ნიკოლოზ სააკაშვილს პირდაპირ ეთერში ჩაეძინა. ფეისბუქ გვერდმა “სირცხვილის კორიდორი” ვიდეო შემდეგი აღწერით გამოაქვეყნა: “ეძინება კაცს, აცალეთ! რა დროს შვილია.”
გავრცელებული ვიდეო პროგრამულადაა დამუშავებული. რეალურად, ხვრინვის ხმა ორიგინალ ჩანაწერში არ გვხვდება და ის მოგვიანებით ამ კონკრეტულ ფრაგმენტზეა დადებული. სრულ ჩანაწერში ჩანს ისიც, რომ სააკაშვილმა ტელეწამყვანის შეკითხვას მალევე უპასუხა.
20 ნოემბერს ნიკოლოზ სააკაშვილი TV პირველის გადაცემაში “დღის ამბები” სტუმრად იმყოფებოდა. სააკაშვილმა შვილის, მიხეილ სააკაშვილის ჯანმრთელობის მდგომარეობისა და 20 ნოემბერს მის მხარდასაჭერად მთავრობის კანცელარიასთან გამართული აქციის შესახებ ისაუბრა.
საუბრის დაწყებამდე პირდაპირი ეთერის კადრებში გადაცემის 8:21-ე წუთზე ჩანს, რომ სააკაშვილი ყურსასმენსა და მაჯის საათს ისწორებს.
ნიკოლოზ სააკაშვილს მაია მამულაშვილმა პირველი შეკითხვა 20 ნოემბერს მთავრობის კანცელარიასთან გამართული აქციის შესახებ დაუსვა. კითხვის დასმის დროს სააკაშვილი ტელეწამყვანს თავდახრილი უსმენდა, ხოლო გადაცემის 8:55-ე წუთზე მან პასუხის გაცემა დაიწყო. აღსანიშნავია, რომ მამულაშვილის საუბრის დროს სააკაშვილს არ ეძინა და გავრცელებულ ვიდეოებში გამოყენებული ხვრინვის ხმები გადაცემის სრულ ჩანაწერში არ ისმის.
გასათვალიწინებელია ისიც, რომ პირდაპირში ჩართვის დროს რესპოდენტამდე წამყვანის ხმა მცირეხნიანი დაგვიანებით მიდის, სააკაშვილის ბუნებრივი პაუზა, სავარაუდოდ, სწორედ ამით იყო განპირობებული. გადაცემიდან მოჭრილი გავრცელებული კადრები კი სწორედ ამ პაუხის დროს წყდება, რაც ქმნის შთაბეჭდილებას, რომ სააკაშვილს ნამდვილად ეძინა და შეკითხვაზე პასუხი ვერ გასცა.
რესპოდენტამდე ხმის დაგვიანებით მისვლას ადასტურებს ისიც, რომ ნიკოლოზ სააკაშვილმა თავისი მიმართვა ტვ პირველისადმი პატივისცემის გამოხატვით დაიწყო და შეკითხვის პასუხზე მხოლოდ შემდეგ გადავიდა, მამულაშვილის მიერ ნათქვამი მადლობა მან გვიან გაიგონა, რის გამოც აქციის შესახებ საუბარი გაწყვიტა.
აღსანიშნავია, რომ ეს არ არის პირველი შემთხვევა, როცა სოციალურ ქსელში მიხეილ საკააშვილის ოჯახის წევრების შესახებ დეზინფორმაცია ვრცელდება. ვრცლად იხილეთ “მითების დეტექტორის” მასალები:
- “მარშალპრესი” სანდრა რულოვსის შესახებ დეზინფორმაციას ავრცელებს
- ფოტომანიპულაცია სანდრა რულოვსის მიერ ორგანოებით ვაჭრობის შესახებ
- ვინ ავრცელებს გიული ალასანიას კომენტარს სააკაშვილზე კონტექსტის გარეშე?
- შეადარა თუ არა გიული ალასანიამ მიხეილ სააკაშვილი ალექსანდრე მაკედონელს?
“სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს.” შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
