18-19 მაისს სამთავრობო სარედაქციო პოლიტიკის მქონე მედია POSTV-მ, საინფორმაციო სააგენტოებმა INFO9 და დაიჯესტი • Digest-მა, ასევე ფეისბუქ გვერდმა Gogaggg-მ გაავრცელეს მსახიობ ნანკა კალატოზიშვილის ვიდეო, რომელშიც ის ამბობს: ,,მართლა ძალიან მშურს უკრაინელების”. ვიდეო რუსეთის მიერ განადგურებული უკრაინული ქალაქებისა და შენობების, დაშავებული ადამიანებისა და სამხედროების საფლავების ვიდეოებით გრძელდება, მას გასდევს წარწერა: ,,მათ უკრაინელების შურთ…”.
ნანკა კალატოზიშვილის ვიდეო მანიპულაციურად ვრცელდება. მსახიობი ტელეკომპანია ,,ფორმულასთან” უკრაინაში მიმდინარე ომს არ გულისხმობს. ის პროტესტის საშუალებით ხელისუფლების ცვლილებაზე საუბრობს, უკრაინის მაგალითს იხსენებს და ამბობს, რომ უკრაინელების ერთიანობისა და გაუტეხლობის შურს.
2023 წლის 19 მაისს თბილისში გაიმართა აქცია – ,,რუსული თვითმფრინავი ევროკავშირში არ ჯდება”. პროტესტი საქართველო-რუსეთს შორის პირდაპირი ავიამიმოსვლისა და რუსეთის მიერ საქართველოს მოქალაქეებისთვის უვიზო რეჟიმის შემოღების წინააღმდეგ იყო. გავრცელებული ვიდეოს ფრაგმენტიც ამავე აქციაზეა გადაღებული. ნანკა კალატოზიშვილი ,,ფორმულას” ჟურნალისტთან ინტერვიუში ამბობს, რომ უკრაინელების შურს, რადგან მათ ,,თავისი ერთობით, ერთად დგომითა და იმით, რომ ვერ გატეხეს” პრორუსული ხელისუფლების შეცვლა მოახერხეს. ის არსად ამბობს, რომ ომის შურს.
| ნანკა კალატოზიშვილის მოჭრილი ვიდეო | ნანკა კალატოზიშვილის სრული ვიდეო |
| ,,მართლა ძალიან მშურს უკრაინელების…” | ,,მართლა ძალიან მშურს უკრაინელების. მაიდანი იყო მშვიდობიანი აქცია და ჩვენზე მეტად პრორუსი და რუსი ხელისუფლება ჰყავდათ და თავისი ერთობით, ერთად დგომით და იმით, რომ ვერ გატეხეს ისინი, მიაღწიეს იმას, რომ ეს ხელისუფლება შეიცვალა.” |
ვიდეოების მანიპულაციურად გავრცელება პროპაგანდისათვის ნაცნობი ხერხია. პროსახელისუფლებო მედია და საინფორმაციო სააგენტოები სამთავრობო პროპაგანდის გაძლიერებას ემსახურებიან და იმეორებენ, თითქოს, ხელისუფლების მოწინააღმდეგეებს საქართველოში ომი უნდათ.
,,მითების დეტექტორს” არაერთი რედაქტირებული ვიდეო აქვს გამოვლენილი:
- ფეისბუქზე ნიკა გვარამიას მიმართვის დარედაქტირებული ვიდეო ვრცელდება
- ფეისბუქზე ჯაფარიძის ,,სიცრუის დეტექტორში” სტუმრობის დარედაქტირებული ვიდეო ვრცელდება
- ფეისბუქზე ირაკლი ტაბლიაშვილის მონოლოგის დარედაქტირებული ვიდეო ვრცელდება
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
