2021 წლის 4 მაისს “ხარისხის არხის” ტელეწამყვანმა დავით გიორგობიანმა პოსტი გამოაქვეყნა. პოსტის თანახმად, რომის პაპმა განაცხადა, რომ არავაქცინირებული ადამიანები სამოთხეში ვერ შევლენ. გიორგობიანის თქმით, პაპის ამგვარმა “კურთხევამ” ხალხს უნდა დაანახოს, რომ სინამდვილეში ყველა რელიგიას ერთი ღმერთი არ სწამს.
დავით გიორგობიანის მტკიცება, თითქოს რომის პაპმა ვაქცინაცია სამოთხეში მოსახვედრად აუცილებელ პირობად დაასახელა, სიმართლეს არ შეესაბამება. მართალია, რომის პაპი ფრანცისკე კორონავირუსი საწინააღმდეგო ვაქცინაციას მხარს უჭერს, თუმცა მას ვაქცინაციასთან დაკავშირებით მსგავსი განცხადება არ გაუკეთებია. მსგავსი შინაარსის ინფორმაციის პირველწყარო კი სატირულმა გამოცემა The Babylon Bee-ია, რაც იმას ნიშნავს, რომ ამბავი გამოგონილია.
ამერიკულმა სატირულმა გამოცემამ The Babylon Bee რომის პაპის შესახებ აღნიშნული ხუმრობა 2020 წლის 30 ნოემბერს შემდეგი სათაურით გაავრცელა – “პაპი ფრანცისკეს თქმით, კორონავირუსის ვაქცინა სამოთხეში შესასვლელად აუცილებელი იქნება”. სატირული შინაარსის ახალ ამბავში პაპი ფრანცისკეს შემდეგ ყალბ ციტატასაც ვხვდებით: “უნდა ვუფრთხილდეთ უდიდეს მიწიერ ცოდვას: COVID-19-ის ვაქცინის არმიღებას. ღმერთმა პირადად გამაფრთხილა, რომ არავის შეუშვებს სამოთხეში, ვინც ამ უსაფრთხო ვაქცინის ორივე დოზას არ მიიღებს!”
სატირული ამბავი რეალურ ფაქტად პირველად ფეისბუქის ინგლისურენოვანმა მომხმარებლებმა 2020 წლის დეკემბერში გააზიარეს. პარალელურად დეზინფორმაცია რუსულ სოციალურ ქსელებსა და ბლოგებზეც გამოჩნდა. ერთ-ერთი რუსული ბლოგის თანახმად, პაპი ადამიანებს არა მხოლოდ ვაქცინაციის, არამედ ხელზე და შუბლზე ანტიქრისტეს ნიშნის აღბეჭდვისკენაც მოუწოდებდა. ხოლო ზოგიერთმა რუსულმა ინტერნეტ გამოცემამ The Babylon Bee სანდო წყაროდ მიიჩნია და მასზე დაყრდნობით, ახალი ამბავი მოამზადა.
რეალურად, პაპი ფრანცისკე კორონავირუსის ვაქცინების მხარდამჭერია და იგი ვაქცინების სამართლიანი გადანაწილების აუცილებლობაზე ჯერ კიდევ 2020 წლის სექტემბრიდან საუბრობდა. პირველი ვაქცინების გამოჩენის შემდეგ, პაპმა არაერთხელ აღნიშნა, რომ საერთაშორისო თანამეგობრობამ ვაქცინების ხელმისაწვდომობის გაზრდაზე უნდა იმუშაოს და გლობალური სამედიცინო კრიზისის დაძლევას ნაციონალიზმმა ხელი არ უნდა შეუშალოს. პაპი ფრანცისკე კორონავირუსზე 2021 წლის 14 იანვარს აიცრა. ვაქცინაციის თემას პაპი 2021 წლის 4 აპრილს სააღდგომო ქადაგებაშიც შეეხო და განაცხადა, რომ საერთაშორისო საზოგადოებამ ვაქცინებზე ხელმისაწვდომობის გასაზრდელად უნდა იმუშაოს, რადგან ვაქცინა აუცილებელი იარაღია პანდემიის დასამარცხებლად.
The Babylon Bee-ის შესახებ
The Babylon Bee კონსერვატიული ონლაინ გამოცემაა, რომელიც რელიგიის, პოლიტიკის, საჯარო ფიგურებისა და მიმდინარე მოვლენების შესახებ სატირულ ახალ ამბებს ამზადებს. გამოცემა 2016 მარტში შეიქმნა. ჩვენს შესახებ განყოფილებაში მას მითითებული აქვს, რომ ის სატირული ხასიათისაა და წერს ქრისტიანობის, პოლიტიკისა და ყოველდღიური ცხოვრების შესახებ. ვებზე გამოქვეყნებული ინფორმაციის გასაჩავრების სურვილის შემთხვევაში კი გამოცემა მკითხველს ურჩევს, ღმერთს მიმართოს.
2019 წლის 16 აგვისტოს The Conversation-ის მიერ გამოქვეყნებული კვლევის მიხედვით, The Babylon Bee ერთ-ერთია იმ სატირულ გამოცემათაგან, რომლის მიერ შექმნილ ხუმრობებსაც ადამიანები ყველაზე ხშირად მიიჩნევენ რეალურ ამბებად.
დავით გიორგობიანის შესახებ
დავით გიორგობიანი “ხარისხის არხის” წამყვანია, რომელიც ანტიდასავლური კონსპირაციებით არის ცნობილი. მედიაჩეკერის თანახმად, არხზე უდიდესი დრო ეთმობა, ID ბარათების კრიტიკას, „მხეცის ნიშნებსა და ჩიპებზე“ საუბარს.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
