25 აგვისტოს ქართულენოვანმა ფეისბუქ ანგარიშებმა (1,2) ქალთა ძალოსნობაში შეჯიბრის შესახებ გაავრცელეს ვიდეო, აღწერით: “ევროპის უძლიერესი ქალბატონი კაცი გახდა”. ვიდეოში პოდიუმზე მეორე და მესამე ადგილებზე მდგომ ორ პირს ვხედავთ, რომელთაგანაც ერთს ხელში ბავშვი უჭირავს. კიდევ ერთი პირი პოდიუმზე გამარჯვებულისთვის განკუთვნილ ადგილს იკავებს და თასს აღმართავს.
დაჯილდოების ცერემონიის ამსახველი ვიდეო, რომელიც ქალთა ძალოსნობაში შეჯიბრს ეხება, მცდარი აღწერით ვრცელდება. ვიდეოში Official Strongman-ის მიერ გამართულ ევროპის ჩემპიონატზე ქალთა შორის 64 კილოგრამამდე წონით კატეგორიაში გამარჯვებულების დაჯილდოებას ვხედავთ, რომელშიც ბრიტანელმა სპორტსმენმა ქეით კონოლიმ გაიმარჯვა. მტკიცება, რომ ის კაცია, სიმართლეს არ შეესაბამება.
გავრცელებული ვიდეო ძალოსნობის ლიგა Official Strongman-ს ეკუთვნის. ვიდეო ლიგის ინსტაგრამ და ფეისბუქ გვერდებზე 18 აგვისტოს გამოქვეყნდა (1,2). ვიდეოში ლიგის მიერ ჩატარებული ევროპის ჩემპიონატის 64 კილოგრამამდე წონით კატეგორიაში გამარჯვებული ქალები ჩანან.
აღნიშნულ შეჯიბრში პირველი ადგილი ბრიტანელმა ძალოსანმა ქეით კონოლიმ დაიკავა. კონოლი ლიგის მიერ გამოქვეყნებულ ვიდეოში მონიშნულია და ლიგამ სოციალურ ქსელებში მის შესახებ სხვა პოსტიც გამოაქვეყნა.
კონელი პროფესიონალი ძალოსანია და ის სხვადასხვა კონკურსში უკვე წლებია მონაწილეობს.
ქეით კონელი (მარცხნივ) 2016 წლის “ინგლისის უძლიერესი ქალის ჩემპიონატის” საკვალიფიკაციო ეტაპზე, ლანკასტერში. ფოტო: lancasterguardian.co.uk
ბრიტანელმა სპორტსმენმა ძალოსნობის შეჯიბრში მონაწილეობა პირველად 2015 წელს მიიღო. შეჯიბრის ამსახველი ვიდეო თავად სპორტსმენის იუთუბ არხზე დღემდე ხელმისაწვდომია.
კადრი კონოლის პირველი შეჯიბრიდან, 2015 წ. სქრინშოტი: youtube.com
ევროპის ჩემპიონატში გამარჯვებულის ვინაობა და სქესი “მითების დეტექტორს” Official Strongman-მაც დაუდასტურა. შესაბამისად, გავრცელებული ინფორმაცია, რომ ჩემპიონატის გამარჯვებული კაცია, დეზინფორმაციაა.
წყაროების შესახებ:
დავით ჯებაშვილი ანტიდასავლური და ანტიოპოზიციური შინაარსის ინფორმაციას, მათ შორის ყალბ ცნობებს რეგულარულად ავრცელებს. “მითების დეტექტორმა” ჯებაშვილის მიერ გავრცელებული დეზინფორმაცია წასრულშიც არაერთხელ გადაამოწმა.
დავით ჩიხელიძე „რეგიონული განვითარების და ხელშეწყობის ცენტრის“ თავმჯდომარეა. ჩიხელიძე ძირითადად ოპოზიციის მადისკრედიტირებელი შინაარსის პოსტებს აქვეყნებს. 2020 წელს ის ეროვნული დემოკრატიული ინსტიტუტის (NDI) დისკრედიტაციის კამპანიაში მონაწილეობდა. 2024 წლის აპრილში მან “მთავარი არხის” სახელით გავრცელებული ყალბი პოსტერიც გამოაქვეყნა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
