29 ივლისს ბექა ანჯაფარიძემ საკუთარ ფეისბუქ ანგარიშზე ადამიანთა მრავალრიცხოვანი შეკრების ამსახველი ვიდეო შემდეგი კომენტარით გაავრცელა: „ოხ ეს ,,ბნელი” ანტივაქსერები ლონდონი“. ვიდეოში რაიმე სახის მოწოდება ვაქცინაციის წინააღმდეგ არ ისმის.
ბექა ანჯაფარიძის გავრცელებული პოსტი ვიდეომანიპულაციაა. რეალურად, კადრები არა ლონდონის აქციას, არამედ ისლანდიის ნაკრების გულშემატკივრების რეაქციას ასახავს. ვაქცინაციასთან დაკავშირებით ლონდონში აქციები მართლაც იმართება, თუმცა არა ისეთი მრავალრიცხოვანი, როგორც ეს გავრცელებულ ვიდეოში ჩანს.
რა ხდება ვიდეოში?
სინამდვილეში ვიდეო კოვიდ-19-ის პანდემიამდე არის გადაღებული და 2016 წლის 4 ივლისს უეფას ჩემპიონთა ლიგის მეოთხედფინალში საფრანგეთთან დამარცხების შემდეგ ისლანდიაში დაბრუნებული ეროვნული ნაკრების დასახვედრად შეკრებილი 10 000 გულშემატკივრის რეაქციას ასახავს. ისინი ნაკრებს პატივისცემის გამოსახატავად ე.წ. ვიკინგების ტაშით ეგებებიან.
აღსანიშნავია, რომ დიდ ბრიტანეთში გაიმართა აქციები, რომელიც მიმართული იყო ვაქცინაციისა და კოვიდ 19-ის გამო დაწესებული შეზღუდვების, მათ შორის, ლოკდაუნის წინააღმდეგ. გამოცემა Independent-ის ცნობით 9 მილიონიან ლონდონში დემონსტრაციებს ათასობით ადამიანი ესწრებოდა, მანჩესტერსა და ბირმინგჰემში კი – ასობით.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
