26 ივლისს რუსულენოვან მედიებში ( avia.pro, glavny.tv, smolnarod.ru) გამოქვეყნდა სტატია, რომელშიც ტელეგრამ-არხზე დაყრდნობით აღნიშნულია, რომ უკრაინაში თურქეთის მიერ კონტროლირებადი სირიელი და ლიბიელი ტერორისტები შენიშნეს. იდენტური ინფორმაცია avias.pro-ზე დაყრდნობით ქართულმა კრემლისტურმა ონლაინ გამოცემა – “საქართველო და მსოფლიომაც” გამოაქვეყნა.
სტატიებში აღნიშნულია, რომ ტერორისტების კვალის წასაშლელად მათ უკრაინული პასპორტები გადასცეს და ერთ-ერთი მათგანი მაშინ დააკავეს, როდესაც ის უკრაინიდან პოლონეთში გადასვლას ცდილობდა. დაკავება იარაღის უკანონო ვაჭრობისთვის მოხდა. ინფორმაციას თან ორი ფოტო ერთვის, რომელიც გამოცემების მიხედვით, აღნიშნული ფაქტის მტკიცებულებებს წარმოადგენს. ერთ-ერთ ფოტოზე პასპორტია გამოსახული, რომელიც აბუ ალ რაჰმან ფაიდს ეკუთვნის. მეორე ფოტოზე კი დაკავების ამსახველი კადრებია – დაკავებულის სახე დაბლარულია, ამიტომ მისი იდენტიფიცირება შეუძლებელია.
ინფორმაცია, თითქოს უკრაინაში სირიელი და ლიბიელი ტერორისტები შენიშნეს, ყალბ მტკიცებულებებს ეფუძნება. დაკავების ამსახველი ფოტო 2021 წელსაა გადაღებული და არა უკრაინას, არამედ პოლონეთის პოლიციის ცენტრალური საგამოძიებო ბიუროს მიერ ფულის გამოძალვის ბრალდებით კრიმინალური დაჯგუფების წევრების დაკავებას ასახავს. გამოქვეყნებული პასპორტის ფოტო კი პროგრამულადაა დამუშავებული. პასპორტი იდენტური ნომრით ინტერნეტში 2016 წლიდან აიფონ შვიდ სტანისლავოვიჩის სახელით იძებნება.
გავრცელებული ინფორმაცია, თითქოს უკრაინაში სირიელი და ლიბიელი ტერორისტები შენიშნეს, ყალბ მტკიცებულებებს ეფუძნება. ფოტო, რომელიც რუსული მედიების მიხედვით, ტერორისტის დაკავებას ასახავს, 2021 წლის 1 ივნისს პოლონეთის პოლიციის ცენტრალური საგამოძიებო ბიუროს ვებ-გვერდზეა გამოქვეყნებული. კადრები ჯგუფური დანაშაულის ბრალდებით 5 ადამიანის (პოლონეთის, უკრაინის და ნიგერიის სამი მოქალაქის) დაკავებას ასახავს. მათ ბრალად გერმანული კომპანიისთვის თაღლითური სქემით 1,7 მილიონი აშშ დოლარის გამოძალვა ედებოდათ.
კიდევ ერთი “მტკიცებულება”, რომელსაც გამოცემები აქვეყნებენ, არის პასპორტი ნომრით HE784147, რომელშიც ხელით სახელი აბუ ალ რაჰმან ფაიდი არის ჩაწერილი. Tineye -ის ფოტოს საძიებო სისტემით აღმოჩნდა, რომ პასპორტი იდენტური ნომრით ინტერნეტში 2016 წლიდან იძებნება.
2016 წელს უკრაინულმა ელექტრონული ტექნიკის კომპანიამ Алло მომხმარებლებისთვის აქცია, სახელწოდებით ” რას გააკეთებდი აიფონ შვიდისთვის” გამოაცხადა. კომპანიის თანახმად, პირველი ხუთი მომხმარებელი, რომელიც სახელს და გვარს აიფონ შვიდად გადაიკეთებდა, აიფონის აღნიშნულ მოდელს სიმბოლურ ფასად 1 გრივნად იყიდდა. ერთ-ერთი ასეთი მომხმარებელი სწორედ აიფონ შვიდი სტანისლავოვიჩი გახდა, პასპორტის ნომრით HE784147 , რომელმაც რეალური სახელი ალექსანდრ პანინი დროებით აიფონის მოგების მიზნით გადაიკეთა. პასპორტის ნომერი, რომელიც რუსული მედიის ცნობით, აბუ ალ რაჰმან ფაიდს ეკუთვნის, სინამდვილეში აიფონ შვიდ სტანისლავოვიჩისაა, რომელიც აქციის ერთ-ერთი მონაწილეა.
რუსული მედიის მიერ გამოქვეყნებულ პასპორტის ფოტოზე ჩანს, რომ პასპორტი მაგიდის ზედაპირზე დევს. აიფონ სიმ სტანისლავოვიჩის პასპორტიც, რომელსაც იდენტური ნომერი აქვს, ასევე მაგიდაზე დევს. ორივე ფოტოზე დაკვირვებით აშკარაა, რომ რუსული მედიის მიერ გავრცელებული პასპორტი აიფონ სიმ სტანისლავოვიჩის პასპორტის ფოტომანიპულაციაა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
