12 მარტს ონლაინ გამოცემა CNEWS-მა გამოაქვეყნა ინფორმაცია, სათაურით “ასტრაზენეკას” უსაფრთხოებაზე “ჯანმოს” პასუხი არ აქვს.” ინფორმაციაში აღნიშნულია, რომ ევროპის ათმა ქვეყანამ AstraZeneca-ს კოვიდსაწინააღმედგო ვაქცინის გამოყენებაზე უარი თქვა, ჯანდაცვის მსოფლიო ორგანიზაციაში კი ამის მიზეზი არ იციან და მოწოდებულ ინფორმაციაზე დაყრდნობით “ასტრაზენეკას” ვაქცინის უსაფრთხოებას ახლა სწავლობენ. სათაური კი ქმნის შთაბეჭდილებას, რომ “ასტრაზენეკასთან” დაკავშირებით ჯანმოს პასუხი არ აქვს.
CNEWS სტატია დეზინფორმაციულ სათაურსა და მანიპულაციურ მტკიცებას შეიცავს. “ასტრაზენეკას” უსაფრთხოება ჯანმოს ეჭვის ქვეშ არ დაუყენებია. ევროპის რამდენიმე სახელმწიფოს უარი არ უთქვამს “ასტრაზენეკას” ვაქცინის გამოყენებაზე, არამედ დროებით შეაჩერა მათი მოხმარება. ამის მიზეზი პაციენტებში ვაქცინის მიღების შემდეგ სისხლის შედედების ნიშნების გამოვლენა გახდა და ეს მიზეზი ჯანმოსთვისაც ცნობილი იყო. ჯანმომ განაცხადა ისიც, რომ ასტრაზენეკას ვაქცინა საფრთხეს არ წარმოადგენს და ვაქცინაციის პროცესი უნდა გაგრძელდეს.
11 მარტს ავსტრიის მარეგულირებელმა ორგანომ AstraZeneca-ს ვაქცინის გამოყენება მას შემდეგ შეაჩერა, რაც პაციენტებში ვაქცინის მიღების შემდეგ სისხლის შედედების ნიშნები გამოვლინდა. შემდეგი დღეების განმავლობაში ანალოგიური გადაწყვეტილება ევროკავშირის რამდენიმე სხვა ქვეყანაშიც მიიღეს. აღსანიშნავია, რომ ამ ქვეყნებმა AstraZeneca-ს ვაქცინის გამოყენება დროებით შეაჩერეს, რაც სამედიცინო სფეროში ნებისმიერი მედიკამენტის გამოყენებისას ნორმალური მოვლენაა.
CNEWS-ის მტკიცებისგან განსხვავებით, ევროკავშირის ქვეყნების ამ გადაწყვეტილებების შემდეგ ჯანდაცვის მსოფლიო ორგანიზაციას არ განუცხადებია, რომ “ასტრაზენეკას” უსაფრთხოებაზე პასუხი არ აქვს და ორგანიზაციაში არ იციან, რატომ შეჩერდა ვაქცინის გამოქვეყნება ევროპის სახელმწიფოებში.
12 მარტს ამ თემაზე ორგანიზაციის ხელმძღვანელის, ტედროს გებრეისუსის განცხადებაში ნათქვამია, რომ WHO-სთვის ცნობილია, რომ “ასტრაზენეკას” შეჩერების მიზეზი სისხლის შედედების შემთხვევები გახდა და ორგანიზაცია ყველა კოვიდსაწინააღმდეგო ვაქცინის უსაფრთხოებაზე დაკვირვებას განაგრძობს. გებრეისუსმა ხაზი გაუსვა ევროპის მედიკამენტების სააგენტოს (EMA) კომენტარსაც და აღნიშნა, რომ ვაქცინაციის პროცესის გაგრძელება გამოძიების პარალელურადაც შესაძლებელია.
12 მარტს განცხადება ჯანდაცვის მსოფლიო ორგანიზაციის წარმომადგენელმა მარგარეტ ჰარისმაც გააკეთა. მან თქვა, რომ AstraZeneca-ს ვაქცინა შესანიშნავია და კარგია, რომ თითოეულ საეჭვო შემთხვევაზე გამოძიება მიმდინარეობს, რადგან ეს ვაქცინაციის პროცესის გამართულობაზე კიდევ ერთხელ მიუთითებს. ჰარისმა აღნიშნა ისიც, რომ ვაქცინაციასა და თრომბოემბოლიას შორის კავშირი არ დასტურდება და “ასტრაზენეკას” ვაქცინის გამოყენება გაგრძელდება. ჰარისმა უარყო ცნობა იმის შესახებაც, თითქოს “ასტრაზენეკას” ვაქცინის შედეგად განვითარებული თრომბით ადამიანი გარდაიცვალა. ჯანმოს წამომადგენლის მიხედვით, არცერთ კოვიდსაწინააღმდეგო ვაქცინას სიკვდილი არ გამოუწვევია.
AstraZeneca-ს წარმოებული კოვიდსაწინააღმედგო ვაქცინის შესახებ დამატებითი ინფორმაციისთვის იხილეთ “მითების დეტექტორის” მასალები:
- “სპუტნიკი”, “საქინფორმი” და News Front-იAstraZeneca-ს წინააღმდეგ და Sputnik V-ის სადარაჯოზე
- AstraZeneca-ს ვაქცინა ნიურნბერგის კოდექსს არ არღვევს
- რამდენად უსაფრთხო იქნება ვაქცინა, რომლის შესყიდვის შესახებ საქართველომ განაცხადი გააკეთა?
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
