2021 წლის 18 დეკემბერს ორგანიზაცია “ერი და სახელმწიფოს” ხელმძღვანელმა ზვიად ტომარაძემ პოსტი გამოაქვეყნა, რომელშიც ნათქვამია, რომ ისრაელის პრემიერ-მინისტრმა სავაჭრო ცენტრების პროტესტის შედეგად მოლებსა და სავაჭრო ცენრებში შესასვლელად ე.წ. “მწვანე პასპორტის” მოთხოვნა გააუქმა. ტომარაძემ იგივე ინფორმაცია 19 დეკემბერს მთავრობის კანცელარიის წინ “მწვანე ბარათის” გაუქმების მოთხოვნით გამართულ აქციაზე სიტყვით გამოსვლის დროსაც გააჟღერა და საქართველოს მთავრობას ისრაელისთვის მიბაძვისა და კოვიდ პასპორტების გაუქმებისკენ მოუწოდა.
ინფორმაცია ისრაელის სავაჭრო ცენტრებში “მწვანე პასპორტის” მოთხოვნის გაუქმების შესახებ შეცდომაში შემყვანია. ისრაელის მთავრობამ “მწვანე პასპორტის” მქონე პირებისთვის სავაჭრო ცენტრებში შესვლისას ერთდღიანი ქაღალდის სამაჯურების გაცემის ინიციტივის განხორციელებაზე მართლაც უარი თქვა, თუმცა სავაჭრო ცენტრებში განთავსებულ რიგ ობიექტებში “კოვიდ სტატუსის” წარმოდგენა კვლავ სავალდებულოა.
მას შემდეგ, რაც ისრაელში კორონავირუსის ომიკრონ ვარიანტის შემთხვევების რაოდენობა 89-მდე გაიზარდა, ჯანდაცვის სამინისტრომ მთავრობას ახალი შეზღუდვების დაწესების რეკომენდაციით მიმართა. მთავრობის ინიციატივით, სხვა შეზღუდვებთან ერთად 19 დეკემბრიდან ისრაელის ყველა იმ დახურულ კომერციულ სივრცეში, რომლის ფართობი 10 000 კვადრატულ მეტრს აღემატება (მათ შორისაა მოლები და სავაჭრო ცენტრებიც), შესვლას მხოლოდ სრულად ვაქცინირებული, კორონავირუსზე ტესტის უარყოფითი პასუხის მქონე ან ბოლო ექვსი თვის განმავლობაში კოვიდგადატანილი ადამიანები შეძლებენ, ხოლო “მწვანე” სტატუსის არმქონე პირებს მოლის სივრცეში მხოლოდ სასურსათო მაღაზიების ან აფთიაქის მომსახურების მიღება შეეძლებათ, სხვა მაღაზიებსა თუ კორმერციულ ობიექტებში მათი შესვლა დაშვებული არ არის.
აღნიშნული რეგულაციის აღსრულება “ფერადი სამაჯურების” სისტემით უნდა მომხდარიყო: ყველა მწვანე სტატუსის მქონე პირისთვის სავაჭრო ცენტრის შესასვლელში დაცვის თანამშრომელს ფერადი ქაღალდის სამაჯური უნდა გადაეცა, რათა ისინი მწვანე პასპორტის არმქონე ადამიანებისგან განესხვავებინათ. მართალია, 15 დეკემბერს სავაჭრო ცენტრების პროტესტის შემდეგ “ფერადი სამაჯურების” ინციატივის განხორციელებაზე მთავრობამ უარი თქვა, თუმცა ეს არ ნიშნავს, რომ მოლებსა და სავაჭრო ცენტრებში შესასვლელად “მწვანე პასპორტების” მოთხოვნა სრულად გაუქმდა, უბრალოდ აღნიშნული რეგულაციის აღსრულება “ფერადი სამაჯურების” გამოყენებით აღარ მოხდება.
Times Of Israel-ის მიხედვით, საბოლოოდ, მოლებსა და სავაჭრო ცენტრებთან მიმართებით ისრაელის მთავრობამ შემდეგი შეზღუდვები დააწესა: 100 კვადრატულ მეტრზე მეტი ფართობის მქონე მაღაზიებში შესასვლელად, რომელიც ღია ან დახურულ სავაჭრო ცენტრში მდებარეობს, როგორც მომხმარებელმა, ისე მომსახურე პერსონალმა “მწვანე პასპორტი” უნდა წარმოადგინოს. მწვანე პასპორტი აუცილებელია მოლების შიგნით განთავსებული საკვები ობიექტებისა და რესტორნების მომსახურებით სარგებლობისთვის. სავაჭრო სივრცეებში მწვანე პასპორტის მოთხოვნიდან გამონაკლისი დასაშვებია მხოლოდ სასურსათო მაღაზიებსა და აფთიაქებში.
ზვიად ტომარაძეს კორონავირუსის პანდემიის, ვაქცინების და Covid-19-თან დაკავშირებული შეზღუდვების შესახებ წარსულში არაერთხელ გაუვრცელებია მცდარი და შეცდომაში შემყვანი ინფორმაცია:
- ზვიად ტომარაძის 3 დეზინფორმაცია და 1 მანიპულაცია PCR ტესტების და ვაქცინების შესახებ
- იცავს თუ არა ისრაელს ვაქცინაცია?
- ავრცელებენ თუ არა ვაქცინირებულები და არავაქცინირებულები ვირუსს თანაბრად?
- ზვიად ტომარაძის 5 ტყუილი და 19 საბაბი
23 დეკემბრის მდგომარეობით, ისრაელში კორონავირუსის 9 960 აქტიური შემთხვევაა, რომელთანაგანც მძიმედ ინფიცირებულია 78 პაციენტი (0.8%). ამასთანავე, ქვეყანაში ამ დრომდე ომიკრონ შტამის 170-ზე მეტი შემთხვევა დაფიქსირდა. ისრაელის მოსახლოების 63%-ზე მეტი – ორი დოზით, ხოლო 70% სულ მცირე ერთი დოზითაა ვაქცინირებული.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
