14 აგვისტოს ფეისბუქ მომხმარებელმა Μαίρη Ορθόδοξη-მა ფეისბუქ ჯგუფში ЗА ПУТИНА – ЗА РОССИЮ უკრაინელი ობოლი ბავშვების შესახებ რუსულ ენაზე პოსტი გამოაქვეყნა. აღწერის მიხედვით, უკრაინის დნიპროპეტროვსკის რეგიონიდან უკრაინელი ობლები საიდუმლოდ თურქეთში წაიყვანეს და ნათესავებს მათი ნახვისა და სახლში დაბრუნების უფლებას არ აძლევენ. პოსტს თან ახლავს თურქეთის ერთ-ერთი სასტუმროს ფოტო, მისამართი და ვიდეო. ავტორი თურქეთში დასასვენებლად მყოფ ჯგუფის წევრებს სთხოვს, მივიდნენ ამ სასტუმროში და იქ მყოფ ობლებს ხილი და ტკბილეული მიუტანონ.
მტკიცება იმის შესახებ, რომ უკრაინელი ობოლი ბავშვები თურქეთში საიდუმლოდ გადაიყვანეს და მათი ნახვის უფლება ნათესავებს არ აქვთ, ყალბია. რეალურად, უკრაინიდან ბავშვების თურქეთში ევაკუაცია საქველმოწმედო პროექტის Childhood Without War-ის ფარგლებში მიმდინარეობს და ბავშვებთან ერთად თურქეთის სხვადასხვა სასტუმროში მათზე მზრუნველი მშობლები და მეურვეებიც არიან განთავსებულნი.
პოსტის ავტორი უკრაინელი ობლების ადგილსამყოფლად თურქეთში, ანტალიის პროვინციაში მდებარე ქალაქ მანავგატის ერთ-ერთ სასტუმროს Larissa Beach Club-ს უთითებს. აღნიშნული სასტუმრო ნამდვილად ამ მისამართზე მდებარეობს.
“მითების დეტექტორი” Larissa Beach Club-ს დაუკავშირდა. სასტუმროს განცხადებით, აპრილის თვიდან მათთან ნამდვილად იმყოფებიან უკრაინელი ბავშვები, თუმცა მათთან ერთად სასტუმროს ლტოლვილი მასწავლებლები და მშობლებიც აფარებენ თავს. სასტუმროში ამჟამად 1600 უკრაინელი ლტოლვილი ცხოვრობს, დაახლოებით 1000 ბავშვია, ხოლო 500 მათგანი მასწავლებელი, მშობელი და ამ ბავშვების მომვლელია. Larrisa Hotels-ის წარმომადგენელმა “მითების დეტექტორს” განუმარტა ისიც, რომ ლტოვილები 2 სასტუმროში არიან განაწილებულნი და სასტუმროებში დარჩენა უკრაინაში საომარი მდგომარეობის გაუქმებამდე შეუძლიათ.
Larissa Beach Club-ში ასევე განაცხადეს, რომ სასტუმროებმა უკრაინელი ლტოლვილები საქველმოქმედო პროექტის Childhood Without War (ბავშვობა ომის გარეშე) ფარგლებში მიიღეს.
პროექტის ოფიციალურ ვებ-საიტზე ვკითხულობთ, რომ ომი ბავშვებს განსაკუთრებულ ზიანს აყენებს, განსაკუთრებით კი იმ ბავშვებს, რომლებიც ობოლთა თავშესაფრებში ცხოვრობენ. პროექტი ამ ბავშვების თურქეთში გადაყვანასა და იქ მათ უსაფრთხო განთავსებას უზრუნველყოფს. პროექტის ბენეფიციარები არიან:
- ობლები
- მზრუნველობას მოკლებული ბავშვები
- რთული საცხოვრებელი პირობების მქონე ბავშვები
- ბავშვების თანმხლები პირები/მშობლები/მეურვეები და მათი სხვა შვილები
საიტზე გამოქვეყნებული მონაცემების მიხედვით, პროექტის ფარგლებში უკრაინიდან თურქეთში უკვე გადაიყვანეს 1427 ბავშვი და 664 მეურვე ან მშობელი.
პროექტის წარმატებით განხორციელებაში აქტიურად მონაწილეობენ თურქეთში უკრაინის საელჩო და ანტალიაში უკრაინის საკოსულო. დიპლომატიური მისიები ადგილობრივ ხელისუფლებასთან და საზოგადოებასთან მუშაობენ, რათა ბავშვებისა და მათ თანმხლები ადამიანების განთავსება და მათი საჭიროებების დაკმაყოფილება მოხდეს.
პროექტს სხვადასხვა საქველმოქმედო ფონდი და კერძო კომპანია აფინანსებს.
პროექტის ინსტაგრამის ანგარიშის მიხედვით, თურქეთში მყოფი უკრაინელი ბავშვები სხვადასხვა გასართობ და შემეცნებით აქტივობაში არიან ჩართული.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
