29 ივნისს ფეისბუქ გვერდმა გლობალური პოლიტიკა კელი დეგნანის ფოტო გამოაქვეყნა წარწერით: “რას გულისხმობდა სწრაფ მოქმედებებში კელი?”. ფოტოს დართული აქვს აღწერა, რომლის მიხედვითაც, ‘სწრაფ მოქმედებებში’ მეორე ფრონტის გახსნა და საქართველოს ომში ჩათრევა იგულისხმება.
მტკიცება, რომ კელი დეგნანის განცხადებაში საქართველოში მეორე ფრონტის გახსნა იგულისხმება, მცდარია. აშშ-ის ელჩმა სწრაფი მოქმედებები ევროპული საბჭოს რეკომენდაციების შესრულების კონტექსტში 29 ივნისს ჟურნალისტებთან საუბრისას ახსენა.
სწრაფი მოქმედებების საჭიროების შესახებ კელი დეგნანმა ჟურნალისტებთან 29 ივნისს “აშშ-ის საერთაშორისო განვითარების სააგენტოს” (USAID) განახლებადი ენერგიისადმი მიძღვნილი შეხვედრის შემდეგ ისაუბრა:
“ჩვენ ვიცით, რომ მთავრობას შეუძლია ძალიან სწრაფად იმოქმედოს, როდესაც კანონმდებლობის შეცვლა სურს. ჩვენ ვნახეთ ეს გასულ დეკემბერს სახელმწიფო ინსპექტორის სამსახურის გაუქმების დაჩქარებული კანონით, დიდი ალბათობით თქვენ ნახეთ ეს თვალთვალის შესაძლებლობების გაზრდის დაჩქარებული კანონით. ასე რომ, ჩვენ ვიცით, რომ მთავრობას შეუძლია სწრაფად იმოქმედოს როცა ეს სურს და ვიცით, რომ ქართველ ხალხს სურს ამ რეფორმების სწრაფად განხორციელება, რათა საქართველო მზად იყოს ევროკავშირის წევრობის სტატუსისთვის.”
აშშ-ის ელჩმა ასევე აღნიშნა, რომ ბევრი დაინტერესებული მხარე: ხალხი, სამოქალაქო საზოგადოება, ოპოზიციური პარტიები და მთავრობის წევრების ნაწილი მზადაა ამ რეკომენდაციების შესრულება დაიწყოს და ყველას სურს იხილოს ძალიან პოზიტიური ანგარიში საქართველოს შესახებ წლის ბოლოსთვის. დეგნანმა ასევე გამოხატა შეერთებული შტატების მზადყოფნა, დაეხმაროს საქართველოს ამ პროცესში.
კელი დეგნანმა არაერთხელ აღნიშნა, რომ აშშ-ს საქართველოს ომში ჩართვა არ სურს და ეს რუსეთის ნარატივია.
გზავნილებზე, თითქოს შეერთებულ შტატებსა და ევროპის ქვეყნებს საქართველოს რუსეთ-უკრაინის ომში ჩათრევა და ქვეყანაში მეორე ფრონტის გახსნა სურთ, “მითების დეტექტორი” ადრეც წერდა:
- ბაღათურიას დეზინფორმაცია, თითქოს ზელენსკი და ბლინკენი საქართველოს მეორე ფრონტის გახსნისკენ მოუწოდებენ
- ფალავანდიშვილი ხელისუფლებას ევროკავშირისგან იცავს
- დასპონსორებული პოსტები და სახელისუფლებო აქტორები ევროპარლამენტარების წინააღმდეგ
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
