16 ოქტომბერს რუსეთის პირველი არხის ეთერში რუსეთ-უკრაინის ომის შესახებ ანიმაციური ფილმი აჩვენეს. ანიმაციის დასაწყისში მსოფლიოს იდუმალი მმართველები აზარტულ თამაშ რულეტს ბურთის ნაცვლად თავის ქალით თამაშობენ, ქალა უკრაინაზე ვარდება, რის შემდეგაც კადრში ზელენსკის თოჯინა ჩნდება, რომელსაც უცნობი ადამიანი მართავს და რომელიც წითელ ღილაკზე დაჭერის შემდეგ დონბასში “აზოვის” ლოგოს მქონე ტანკებს უშვებს. ანიმაციის შემდეგ ნაწილში ჩანს, რომ ზელენსკის თოჯინის მიერ წითელ ღილაკზე ხშირად დაჭერის შედეგად დაღვრილი სისხლი ოქროს ზოდებს ქმნის, რომლებითაც იდუმალი მმართველები მდიდრდებიან. აღნიშნული ანიმაციის სრული ვერსია ქართულენოვანმა ფეისბუქ მომხმარებელმა Giogi Khomeriki-მაც გაავრცელა. ვიდეოს ბოლოს იდუმალ მმართველს იმ ხელს, რომლითაც ის ზელენსკის თოჯინას ათამაშებს, ხმლით აჭრიან, რის შემდეგაც ჩნდება წარწერა “Stop Nazi Games” (შეაჩერეთ ნაცისტური თამაშები). რუსეთის პირველი არხისა და ფეისბუქზე გავრცელებული პოსტის ავტორის მტკიცებით, ვიდეო ფრანგულმა ანიმაციურმა სტუდიამ შექმნა.
გავრცელებული ვიდეო ფრანგულ ანიმაციურ სტუდიას არ ეკუთვნის, ვიდეოს ავტორად დასახელებული ფრანგული ანიმაციური სტუდიის შესახებ რაიმე ინფორმაცია ღია წყაროებში არ იძებნება. ხოლო ანიმაციის სტილი სომეხი ანიმატორის დავით სააკიანცის ერთ-ერთ ნამუშევარს ჰგავს.
გავრცელებული ანიმაცია გამოცემა Delfi-ს ლიეტუველმა ფაქტების ანალიტიკოსებმა შეისწავლეს. გამოცემის მიხედვით, სოციალურ ქსელსა და სხვადასხვა რუსულენოვან მედიასაშუალებაში აღნიშნული ანიმაციის ავტორად ძირითადად ფრანგული “დამოუკიდებელი ანიმაციური სტუდია” Barracuda სახელდებოდა. Delfi-ს მიხედვით, ამ სახელის მქონე სტუდიის, მისი თანამშრომლების, სხვა ნამუშევრების ან შექმნის თარიღის შესახებ ღია წყაროებში რაიმე ინფორმაცია არ იძებნება. ხოლო ვიდეოს ვიზუალი სომეხი ანიმატორი დავიდ სააკიანცის ერთ-ერთი ანიმაციური ფილმის სტილს ძალიან ჰგავს.
სააკიანცი ანიმაციებზე წლებია მუშაობს. მის მიერ შექმნილი სომხურენოვანი სატირული ანიმაციური სერიალი Kill Dim 2011 წელს დაიწყო. ავტორის მიხედვით, სერიალი აზერბაიჯანის პოლიტიკის გროტესკს წარმოადგენდა. 2019 წელს სერიალის Youtube არხი Youtube-ის საზოგადოებრივი სტანდარტების დარღვევის გამო გაუქმდა და ახალი სერიების შექმნაც შეწყდა. თუმცა 2020 წლის ოქტომბერში ინტერნეტში Kill Dim Production-ის ახალი ანიმაციური ფილმის ნაწყვეტი გამოჩნდა, რომელიც შინაარსობრივად და ვიზუალურად რუსეთ-უკრაინის ომთან დაკავშირებით გავრცელებულ ვიდეოს ჰგავს.
მაგალითად, ორივე ანიმაციაში კედელზე დაკიდებულია სხვადასხვა ისტორიული მოვლენის ამსახველი ფოტოები. იმას გარდა რომ ეს კადრები ერთმანეთს ჰგავს, ორივე მათგანში სომხების 1915 წლის გენოციდის კადრები მეორდება.
ამასთანავე, Kill Dim Production-ის ანიმაციაში საკვანძო ადგილი ალიევის თოჯინას უჭირავს, რომელსაც ერდოღანი მართავს. ვიზუალურად და შინაარსობრივად ეს კადრები ზელენსკის თოჯინის მართვასა და მის მიერ ომის ღილაკის გამოყენებას ჰგავს.
დეზინფორმაცები პრეზიდენტი ზელენსკის, აზოვის ბატალიონისა და რუსეთ-უკრაინის ომში ნატო-ს უშუალო მონაწილეობის შესახებ “მითების დეტექტორმა” წარსულშიც გადაამოწმა, ვრცლად იხილეთ:
- ზელენსკისა და მასკის საუბრის პროგრამულად დამუშავებულ ვიდეოში კოკაინი და საბანკო ბარათია დამატებული
- ყავა, ნარკოტიკები თუ სპორტი – რაზე საუბრობდა ზელენსკი რეალურად?
- ჩრდილები, ტელეფონის დამტენები თუ კოკაინი – რა ჩანს ზელენსკის სამუშაო მაგიდაზე?
- აზოვის ბატალიონის მიერ ჯვარზე დონბასელი მეომრის გაკვრის შესახებ ყალბი ინფორმაცია ვრცელდება
- ამერიკელი გენერალი, რომელიც მარიუპოლში არ იმყოფება, მარიუპოლში უკვე მეორედ “დააკავეს”
- რუსულ ჯარებს უკრაინაში არმყოფი ამერიკელი გენერალი არ დაუტყვევებიათ
“სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს.” შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
