28 თებერვალს ქართულენოვანმა ფეისბუქ-ანგარიშმა, ასევე რუსულენოვანმა გვერდმა newsweek_vl და ფეისბუქ პროფილებმა (1, 2, 3) კომპანია SpaceX-ის დამფუძნებლის, ილონ მასკის ტვიტერის სქრინშოთი გამოაქვეყნეს, რომელზეც ჩანს, რომ მასკმა უკრაინის ქალაქ ბახმუტთან დაკავშირებულ ტვიტს უპასუხა და დაწერა, რომ რუსებს ბახმუტი პრაქტიკულად ალყაში ჰყავთ და ეს კარგია.
ქართული და რუსულენოვანი ფეისბუქ-ანგარიშების მიერ გავრცელებული ტვიტების სქრინშოთი ფოტომანიპულაციაა. მასკმა ბახმუტთან დაკავშირებულ ტვიტს ნამდვილად უპასუხა და აღნიშნა რომ ქალაქი “თითქმის ალყაშია”, თუმცა მან “ეს კარგია” არა ბახმუტის შესახებ გამოქვეყნებულ ტვიტზე, არამედ მატრასების კომპანიის მიერ გამოქვეყნებული ვიდეოს ქვემოთ დაწერა.
ილონ მასკმა ტვიტერ-ანგარიშ War Mapper-ის ბახმუტთან დაკავშირებულ პოსტს ნამდვილად უპასუხა და დაწერა – “თითქმის ალყაში” (almost surrounded), თუმცა მას არ დაუწერია, რომ “ეს კარგია”.
რეალურად, მასკმა “ეს კარგია” ტვიტერის ანგარიშ Eight Sleep-ის მიერ გამოქვეყნებულ ტვიტს უპასუხა, რომელიც რუსეთ-უკრაინის ომთან დაკავშირებული არ არის. Eight Sleep მატრასებსა და მატრასის შალითებს აწარმოებს, რომელთა ტემპერატურის რეგულირებაც შესაძლებელია. სწორედ რეგულირებადი ტემპერატურის მატრასის შალითას შეეხებოდა ვიდეო, რომელზეც ილონ მასკმა დაწერა – “კარგია” (it’s good).
აღსანიშნავია, რომ ილონ მასკის ბოლოდროინდელმა განცხადებებმა, უკრაინის მიმართ მისი თავდაპირველი მხარდამჭერის მიუხედავად, კრიტიკა გამოიწვია. მასკის ერთ-ერთი განცხადება ეხებოდა “სამშვიდობო გეგმას”, რომელიც უკრაინის მიერ ნეიტრალიტეტის გამოცხადებას და ყირიმის რუსეთისთვის დათმობას გულისხმობდა. გარდა ამისა, ილონ მასკმა გასული წლის ოქტომბერში აღნიშნა, რომ მისი კომპანია სატელიტურ ინტერნეტ Starlink-ს უკრაინას უფასოდ განუსაზღვრელი ვადით ვეღარ მიაწვდიდა, შემდეგ კი განაცხადა, რომ ინტერნეტის მიწოდებას და დაფინანსებას გააგრძელებდა.
უკრაინის მიმართ მასკის მერყევი მხარდაჭერის და კონტროვერსიული განცხადებების ფონზე თებერვლის ბოლოს სოციალურ ქსელში სატირული ტვიტერ პოსტი გავრცელდა, რომელსაც ზოგიერთი ფეისბუქ მომხმარებელი რეალურ ინფორმაციად აქვეყნებდა. პოსტის თანახმად ტვიტერმა, რომლის გენერალური დირექტორი ილონ მასკია, არავერიფიცირებულ მომხმარებლებს უკრაინის დროშის სიმბოლოს გამოყენება აუკრძალა. ვრცლად იხილეთ “მითების დეტექტორის” მასალა:
წყაროს შესახებ
ფეისბუქ-ანგარიშ Davit Jebashvili-ს დეზინფორმაციისა და ვიზუალური მანიპულაციების შემცველი პოსტები აქამდეც არაერთხელ გაუვრცელებია. ვრცლად იხილეთ “მითების დეტეტორის” მომზადებულ მასალებში:
- ზელენსკის გამოსახულებით მორიგი გაყალბებული კარიკატურა ვრცელდება
- ზელენსკისა და სუნაკის კარიკატურები ინდურ ჟურნალ ANANDA VIKATAN-ს არ ეკუთვნის
- ომი უკრაინაში 2022 წელს თუ პირველადი დახმარების ტრენინგი 2016 წელს – რას ასახავს ფოტოკოლაჟი?
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
