25 თებერვალს ფეისბუქ მომხმარებელმა ბექა ვარდოსანიძემ გამოაქვეყნა პოსტი, რომელშიც ნათქვამია, რომ გავრცელებული ინფორმაციით, ტანკი, რომელმაც უკრაინაში მსუბუქ ავტომობილს გადაუარა არა რუსების, არამედ უკრაინელების იყო და ტექნიკური გაუმართაობის გამო მართვა დაკარგა. ვარდოსანიძის თქმით, ამ მტკიცების არგუმენტი ისაა, რომ რუსული ტანკები კოლონებით დადიან, ხოლო ვიდეოში ასახული ტანკი მარტო მოძრაობდა.
ვარდოსანიძის მიერ გავრცელებული ინფორმაცია სიმართლეს არ შეესაბამება. რეალურად, ქვეითთა საბრძოლო მანქანა, რომელმაც ავტომობილს გადაუარა, რუსეთს ეკუთვნის და მასში რუს დივერსანტთა და მზვერავთა ჯგუფი იმყოფებოდა.
ბექა ვარდოსანიძის მიერ გავრცელებული ვიდეოები დედაქალაქ კიევის ჩრდილოეთით, ობოლონშია გადაღებული. აღნიშნული დეზინფორმაცია, რომელიც რუსული საბრძოლო მანქანის მიერ ჩადენილ ქმედებას უკრაინის არმიას უკავშირებს, რუსულ ტელეგრამ არხებზე გავრცელდა. ინფორმაცია უკრაინის ფაქტების ანალიტიკოსმა ორგანიზაცია StopFake-მა შეისწავლა.
მათი ინფორმაციით კრემლისტურ ტელეგრამ არხებზე გაავრცელეს ფოტო, რომელშიც დაზიანებულ მანქანაში მყოფი მამაკაცი ჩანდა და ამტკიცებდნენ, რომ ეს უკრაინულმა საბრძოლო მანქანამ და უკრაინელმა მებრძოლებმა ჩაიდინეს. ტელეგრამ არხებში მტკიცებულებად ბექა ვარდოსანიძის მსგავსი არგუმენტი მოჰყავთ, რომ დედაქალაქ კიევში ჯერ რუსული საბრძოლო ტექნიკა არ შესულა და შესაბამისად, მშვიდობიან მოქალაქეებს თავს უკრაინელი მებრძოლები ესხმიან.
StopFake-ის ინფორმაციით, რეალურად ქვეითთა საბრძოლო მანქანა რუსულია და მასში რუს დივერსანტთა და მზვერავთა ჯგუფი იმყოფებოდა.
აღსანიშნავია, რომ უკრაინის თავდაცვის სამინისტრომ გაავრცელა ინფორმაცია, რომ ობოლონში მტრის დივერსანტთა და მზვერავთა ჯგუფი იმყოფებოდა. მათ მოქალაქეებს ჯავშანტექნიკის გადაადგილების შესახებ ინფორმაციის მიწოდების, ე.წ. მოლოტოვის კოქტეილების დამზადების და სიფრთხილისკენ მოუწოდეს და სთხოვეს, არ დაეტოვებინათ სახლები.
მოგვიანებით, უკრაინის შეიარაღებულმა ძალებმა გაავრცელეს ინფორმაცია ობოლონში დივერსიული ჯგუფის განადგურების შესახებ.
რუსეთ-უკრაინის ომის მიმდინარეობისას სოციალურ ქსელში არაერთი დეზინფორმაცია გავრცელდა. ვრცლად იხილეთ “მითების დეტექტორის” მასალები:
- “ალტინფო” ნიკოლაევში რუსი სამხედროების შესვლის შესახებ დეზინფორმაციას ავრცელებს
- მაიდანი 2014 წელს თუ კიევი 2022 წელს? – რას ასახავს ვიდეო?
- ალტ-ინფო რუსეთ-უკრაინის ომზე საუბრისას ჩინეთში ქიმიური ნივთიერებების საწყობის აფეთქების კადრებს ავრცელებს
- ვიდეო არა რუსეთ-უკრაინის ომს, არამედ 2016 წლის რუსი პარაშუტისტების კადრებს ასახავს
- 2020 წლის რუსული აღლუმის ფოტოს უკრაინაზე თავდასხმის საილუსტრაციოდ ავრცელებენ
- 2014 წლის ფოტო 2022 წლის ომის დროს ხარკოვის აღების ილუსტრაციად გამოიყენება
- მარიუპოლის დაბომბვის შესახებ ვიდეო ყალბი აღწერით ვრცელდება
- კარდჰუ” რუსული ტანკების კიევთან გამოჩენის საილუსტრაციოდ დონეცკში გადაღებულ ფოტოს ავრცელებს
- უკრაინა თუ სირია? – რას ასახავს სოციალურ ქსელში გავრცელებული ვიდეო
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
