12 ივლისს ფეისბუქ მომხმარებელმა შორე შანიძემ საკუთარ გვერდზე გამოაქვეყნა პოსტი, რომელშიც ამტკიცებს, რომ პრეპარატი პაქსლოვიდი, რომელსაც ფაიზერი აწარმოებს, ქვეყანაში ქართველ ხალხზე საექსპერიმენტოდ შემოაქვთ.
მტკიცება, რომ პრეპარატი პაქსლოვიდი ექსპერიმენტულია და მას ქართველებზე ცდიან სიმართლეს არ შეესაბამება. პრეპარატი ავტორიზებულია როგორც აშშ-ში, ასევე დიდ ბრიტანეთსა და ევროკავშირში. გადაწყვეტილება ეფუძნება კვლევას, რომელიც აჩვენებს, რომ პაქსლოვიდი Covid-19-ით ჰოსპიტალიზების და გარდაცვალების რისკებს 88%-ით ამცირებს. კვლევა 201 ლოკაციაზე ჩატარდა, თუმცა მათ შორის საქართველო არ ყოფილა.
პაქსლოვიდი ერთ-ერთია იმ ანტივირუსულ მედიაკამენტებს შორის, რომელსაც აშშ-ის საკვებისა და მედიკამენტების ასოციაცია (FDA) ზრდასრულებისა და 12 წლიდან ბავშვებისათვის (რომელთა წონა სულ მცირე 40 კილოგრამია) Covid-19-ის წინააღმდეგ რეკომენდაციას უწევს. პრეპარატს FDA-მ გადაუდებელი გამოყენებისათვის ავტორიზაცია 2021 წლის 22 დეკემბერს მიანიჭა.
პაქსლოვიდი შედეგბა ნირმატრელვირისგან, რომელიც SARS-Cov-2-ის პროტეინის ინჰიბიტორია და ორგანიზმში ვირუსის გამრავლებას უშლის ხელს და რიტონავირისგან, რომელიც ნირმატრელვირის დაშლას ანელებს, რათა ის უფრო დიდხანს და უფრო მაღალი კონცენტრაციით დარჩეს ორგანიზმში. პაქსლოვიდის მიღება რეკომენდებულია დღეში ორჯერ, 5 დღის განმავლობაში. FDA-ს შეფასებით, არსებული კვლევები აჩვენებს, რომ ინსტრუქციის დაცვით მიღების შემთხვევაში პრეპარატის სარგებელი აღემატება მის პოტენციურ რისკებს. პაქსლოვიდის გვერდითი ეფექტები მოიცავს გემოს დაქვეითებას, დიარეას, მაღალ წნევას და კუნთების ტკივილს. მისი გამოყენება გარკვეული ჯანმრთელობის პრობლემების მქონე ადამიანებისათვის რეკომენდებული არ არის. ასევე რეკომენდებული არ არის ზოგიერთ მედიკამენტთან ერთად. პლაქსლოვიდი ექიმთან კონსულტაციის შედეგად ინიშნება.
FDA-მ პაქსლოვიდისათვის გადაუდებელი გამოყენების ავტორიზაციის მინიჭება EPIC-HR-ის კვლევაზე დაყრდნობით გამოიტანა, რომელიც რანდომიზებულ, პლაცებოს საკონტროლო ჯგუფს მოიცავდა და იკვლევდა პრეპარატის მუშაობას იმ ზრდასრულებში, რომელთაც Covid-19 ლაბორატორიულად დაუდასტურდათ, თუმცა საავადმყოფოში არ ყოფილან მოთავსებული. მათ არ ჰქონდათ გაკეთებული Covid-19-ის საწინააღმდეგო აცრა და წარსულში Covid-19 არ ჰქონდათ გადატანილი. კვლევამ აჩვენა, რომ იმ მონაწილეებთან შედარებით, ვინც პლაცებო მიიღო, მონაწილეებში, რომელთაც პაქსლოვიდი მიიღეს სიმპტომების გამოვლენიდან 5 დღის განმავლობაში ჰოსპიტალიზების ან გარდაცვალების მაჩვენებელი 88%-ით უფრო ნაკლები იყო.
აღსანიშნავია, რომ კვლევა, რომელიც 2021 წლის 6 ივლისს დაიწყო, 201 ლოკაციაზე ჩატარდა, მათი უმეტესობა აშშ-ში მდებარეობს. საქართველო მათ შორის არ ყოფილა.
ზრდასრული და 12-წლიდან (40 კგ-ზე მეტი წონის) პაციენტებში, რომლებიც ჰოსპიტალიზებული არ არიან და აქვთ დაავადების გართულების მაღალი რისკი, სიმპტომების გამოვლენიდან 5 დღის განმავლობაში პაქსლოვიდით მკურნალობის რეკომენდაციას გასცემს აშშ-ის ჯანდაცვის ეროვნული ინსტიტუტიც (NIH). მაღალი რისკის მქონე პაციენტებში პრეპარატის დანიშვნის რეკომენდაციას გასცემს დიდი ბრიტანეთის ეროვნული ჯანდაცვის სამსახურიც (NHS). პაქსლოვიდი ავტორიზებულია ევროკავშირში გამოყენებისთვისაც ევროპული მედიცინის სააგენტოს (EMA) მიერ. EMA-ს შეფასებაში აღნიშნულია, რომ პრეპარატის უსაფრთხოების დონე დამაკმაყოფილებელია და გვერდითი ეფექტები უმეტესწილად მსუბუქია.
პრეპარატის ავტორიზების შემდეგ, 2022 წლის 24 მაისს აშშ-ს დაავადებათა კონტროლის ცენტრმა (CDC) გამოაქვეყნა პაქსლოვიდით მკურნალობის შედეგების შეფასება, რომელშიც აღნიშნულია, რომ ზოგიერთ შემთხვევაში დაფიქსირდა გამოჯანმრთელებიდან 2-8 დღის შემდგომ Covid-19-ის სიმპტომების განმეორება ან Covid-19-ზე ტესტის დადებითი შედეგი უარყოფითი შედეგის დაფიქსირების შემდეგ. შეფასებაში ნათქვამია, რომ სიმპტომების დაბრუნება ზოგიეთ ინდივიდში შესაძლოა Covid-19-ის ბუნების ნაწილი იყოს და კავშირი არ ჰქონდეს პაქსლოვიდით მკურნალობასთან ან ვაქცინაციასთან. CDC კვლავ უწევს რეკომენდაციას პაქსლოვიდით მკურნალობას და, შეფასების მიხედვით, პრეპარატი ამცირებს ჰოსპიტალიზების და სიკვდილიანობის მაჩვენებელს. CDC-ს შეფასებაში საუბარი არ არის პრეპარატით მკურნალობის შედეგად გამოწვეულ რაიმე განსხვავებულ გვერდით ეფექტებზე.
შორე შანიძეს Covid-19-ის და მისი საწინააღმდეგო ვაქცინების შესახებ დეზინფორმაცია წარსულში არაერთხელ გაუვრცელებია. ვრცლად იხილეთ “მითების დეტექტორის” მიერ მომზადებული მასალები:
- აქვს თუ არა ვაქცინაციის ადგილს მაგნიტური რეაქცია?
- ვინ არის რნმ ტექნოლოგიის გამომგონებელი და განაცხადა თუ არა მან, რომ ვაქცინები მავნებელია?
- შედგა თუ არა პანდემიის “ნიურნბერგის პროცესი 2”?
- რა ცნობები ვრცელდება ვაქცინების გვერდითი მოვლენების შესახებ?
- როგორია კოვიდ ვაქცინების შემადგენლობა და რა კავშირი აქვს დალესს ჯანმოსთან და ВЕЧНЫЙ ЗОВ-თან?
- დეზინფორმაცია, თითქოს ვაქცინის მიღებიდან 3 დღეში 45 000 ადამიანი გარდაიცვალა
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
