ანტივაქსერი ექიმები ვაქცინებსა და კორონავირუსზე დეზინფორმაციას ავრცელებენ

კითხვის დრო: 5 წუთი

კითხვის დრო: 5 წუთი

73
VIEWS

2021 წლის 14 მარტს ფეისბუქ მომხმარებელმა Keti Sesiashvili-მა ზაქარია როჭიკაშვილის გადაცემის “ესკულაპი” ვიდეოჩანაწერი გაავრცელა, რომელშიც ექიმები თინა თოფურია და თინათინ გოცაძე კორონავირუსის ვაქცინების შესახებ საუბრობენ. ჩანაწერში, რომელსაც 21 მარტის მდგომარეობით 16K  ნახვა აქვს.

;

გავრცელებული ვიდეო კორონავირუსისა და ვაქცინების შესახებ რამდენიმე დეზინფორმაციასა, ნახევრად მცდარ მტკიცებას და კონსპირაციას შეიცავს.

დეზინფორმაცია #1 : კორონავირუსის რნმ ვაქცინებში გამოყენებული ტექნოლოგიას პანდემიამდე მხოლოდ ცხოველებზე ცდიდნენ. რნმ-ზე დაფუძნებული ვაქცინების მოქმედება აქამდე ადამიანებში არასოდეს გამოუკვლევიათ.

მესენჯერულ რნმ-ზე დაფუძნებული ვაქცინების შექმნას მეცნიერები 1990-იანი წლებიდან ცდილობენ და კორონავირუსის საწინააღმდეგო რნმ ვაქცინები აღნიშნული ტექნოლოგიის მრავალწლოვან კვლევით გამოცდილებაზეა დაფუძნებული. მიუხედავად იმისა, რომ Pfizer-ისა და Moderna-ს კორონავირუსის ვაქცინებამდე რნმ ვაქცინების ადამიანების დიდ პოპულაციაში მასობრივად გამოყენების პრეცედენტი არ არსებობს, მცდარია, მტკიცება, რომ ამ ტექნოლოგიით დამზადებული ვაქცინები აქამდე მხოლოდ ცხოველებში გამოიყენებოდა.

რეალურად, Moderna და Pfizer-ის გერმანული პარტნიორი BioNTech უკვე ათ წელზე მეტია, რაც რნმ ტექნოლოგიით კიბოსა და სხვადასხვა ინფექციური დაავადების საწინააღმდეგო ვაქცინის დამზადებას ცდილობენ, ხოლო მათი კვლევები მიმდინარეობს როგორც ცხოველებზე, ასევე ადამიანებზე და ჯერკიდევ 2018 წელს რნმ-ზე დაფუძნებული ვაქცინები, როგორც ცხოველების, ისე ადამიანების შემთხვევაში იმედისმომცემ შედეგებს აჩვენებდნენ. სამეცნიერო ჟურნალის Nature-ს 2018 წლის მონაცემების მიხედვით, სხვადასხვა ინფექციური დაავადების წინააღმდეგ კლინიკურ კვლევებს (ე.ი. მათ მოქმედებას იკვლევდნენ ადამიანებში) რნმ-ზე დაფუძნებული 8 სხვადასხვა ვაქცინა გადიოდა, ხოლო კიბოს საწინააღმდეგო რნმ ვაქცინებიდან კლინიკური კვლევის სხვადასხვა ეტაპებზე სულ  25 განსხვავებული ვაქცინა იყო.

დეზინფორმაცია #2 : იაპონიაში Moderna-ს ვაქცინა მას შემდეგ შეაჩერეს, რაც ანაფლაქსიური შოკის ორი შემთხვევა მოხდა.

ამჟამად იაპონიაში Moderna-ს ვაქცინა მარეგულირებელი ორგანოების მიერ ავტორიზებული არ არის და ქვეყანაში ვაქცინაციის პროცესი მხოლოდ Pfizer-ის ვაქცინით მიმდინარეობს. იაპონურმა ფარმაცევტულმა კომპანიამ Takeda Pharmaceutical-მა, რომელიც იაპონიაში Moderna-ს წამომადგენელია, ქვეყნის მთავრობას Moderna-ს ვაქცინის აპლიკაცია დაჩქარებული განხილვისთვის 6 მარტს წარუდგინა. პარალელურად, იაპონიაში ამერიკული ვაქცინის გამოსაცდელად მცირე კლინიკური კვლევაც მიმდინერეობს, რომელშიც 200 ადამიანია ჩართული და სავარაუდოდ 2021 წლის მაისში დასრულდება. სწორედ აღნიშნული კვლევის წარმატებით დასრულების შემდეგ შეძლებს Moderna-ს ვაქცინა იაპონიაში ავტორიზაციის მიღებას.

რაც შეეხება ანაფლაქსიური შოკის (ძლიერი ალერგიული რეაქცია)  შემთხვევებს, 12 მარტის მდგომარეობით იაპონიაში კორონავირუსის ვაქცინაციის შემდეგ დაფიქსირებული 17 ანაფლაქსიური შოკიდან უშუალოდ ვაქცინით მხოლოდ შვიდი იყო გამოწვეული. ვაქცინების უსაფრთხოებასთან დაკავშირებით იაპონიის ჯანდაცვის სამინისტროში მომუშავე ექსპერტთა ჯგუფი ანაფლაქსიური შოკის განვითარების შემთხვევებს აქტიურად სწავლობს, თუმცა ექსპერტების თქმით, იაპონიაში ანაფლაქსიური შოკის შემთხვევები საგანგაშო სიხშირის და სიმწვავის არ არის. ამასთანავე, იაპონიაში ვაქცინაცია გრძელდება და იგი არასდროს შეუჩერებიათ. ამჟამად, იაპონიის მაშტაბით ვაქცინის 437,485 დოზაა ადმინისტრირებული.

დეზინფორმაცია #3: იტალიაში გარდაცვალების სტატისტიკა 2019 წლის 1 დეკემბრიდან 2020 წლის 1 აპრილამდე უმნიშვნელოდ აღემატებოდა 2018 წლის 1 დეკემბრიდან 2019 წლის 1 აპრილამდე სტატისტიკას, რეალურად სულ 16 ადამიანით მეტი გარდაიცვალა. 

გადაცემაში ზაქარია როჭიკაშვილი ამტკიცებს, რომ კორონავირუსის პანდემიის გამოცხადების რეალური საფუძველი არ არსებობდა და იტალიის გარდაცვალების სტატისტიკაზე მიუთითებს. სინამდვილეში, როჭიკაშვილის მიერ მოყვანილი რიცხვები რეალურ სტატისტიკას არ შეესაბამება. UNdata-სა  და Statista-ს მონაცემებით 2018 წლის 1 დეკემბრიდან 2019 წლის 1 აპრილამდე იტალიაში სულ 235 060 ადამიანი გარდაიცვალა მაშინ, როცა 2019 წლის 1 დეკემბრიდან 2020 წლის 1 აპრილამდე იტალიაში ჯამში 258 038 ადამიანი დაიღუპა, რაც წინა მონაცემზე არა 16-ით, არამედ 22 978-ით მეტია.

ამასთანავე, კორონავირუსის პანდემიის პერიოდში გარდაცვალების მაჩვენებლის ზრდის შესაფასებლად როჭიკაშვილის მიერ აღებული პერიოდი არარელევანტურია, რადგან იტალიაში კორონავირუსის პირველი შემთხვევა არა 2019 წლის დეკემბერში, არამედ 2020 წლის თებერვლის მეორე ნახევარში დაფიქსირდა და იტალიაში ეპიდემიური მდგომარეობა არც 2020 წლის 1 აპრილს დასრულებულა. შედარებით მსუბუქი ზაფხულის შემდეგ, იტალიაში, ევროპის სხვა ქვეყნების მსგავსად, 2020 წლის ნოემბრიდან ვირუსის მეორე ტალღა დაიწყო. Statista-ს მონაცემებით, 2020 წელს ყველაზე მაღალი სიკვდილიანობა იტალიაში მარტისა და აპრილის შემდეგ სწორედ ნოემბერსა და დეკემბერში დაფიქსირდა.

;
იტალიაში გარდაცვლილთა თვიური რაოდენობა 2019 წლის იანვირდან 2020 წლის დეკემბრის ჩათვლით. წყარო: Statista

ნაწილობრივ მცდარი: AstraZeneca-ს ვაქცინა არაეფექტიანია და მძიმე გვერდითი მოვლენები ახასიათებს. ვაქცინის ხარისხის გასაუმჯობესებლად ბრიტანეთში ტარდებოდა კვლევა, რათა შეემოწმებინათ AstraZeneca-სა და Pfizer-ის კომბინაცია, თუმცა კვლევა უშედეგო აღმოჩნდა.

2021 წლის 4 თებერვალს ბრიტანეთში AstraZeneca-სა და Pfizer-ის ვაქცინების კომბინაციის ეფექტიანობასთან დაკავშირებით კლინიკური კვლევები მართლაც დაიწყო . კვლევის ფარგლებში 800 მოხალისეს 12 კვირიანი შუალედით ვაქცინის ორი დოზა უნდა გაუკეთდეს, რომელთაგანაც ერთი AstraZeneca-ს წარმოებული იქნება, ხოლო მეორე – Pfizer-ის. თუმცა მტკიცება, თითქოს ამ კვლევის მიზანი AstraZeneca-ს დაბალეფექტიანი ვაქცინის ხარისხის გაუმჯობესება იყო და ეს მცდელობა უშედეგოდ დასრულდა, სიმართლეს არ შეესაბამება. რეალურად, ბრიტანელი მეცნიერები იმის დადგენას ცდილობენ, შესაძლებელია თუ არა კორონავირუსის სხვადასხვა ვაქცინის დოზების კომბინაცია, რათა ვაქცინების ადმინისტრირების პროცესი უფრო მოქნილი გახდეს. სამომავლოდ, ბრიტანელი მეცნიერები სხვა ვაქცინების კომბინაციების დატესტვასაც გეგმავენ. ამასთანავე, ჯერჯერობით აღნიშნული კლინიკური კვლევის შედეგები ცნობილი არ არის, მეცნიერების შეფასებით, კვლევის საბოლოოო შედეგები 2021 წლის ივნისში იქნება ცნობილი.

რაც შეეხება AstraZeneca-ს ვაქცინის უსაფრთხოებასა და ეფექტიანობას, როგორც ვაქცინის კლინიკურმა კვლევებმა აჩვენა, ვაქცინის ეფექტიანობა საშუალოდ 62%-ია, რითაც ის Moderna-სა და Pfizer-ს ჩამორჩება, თუმცა 2021 წლის თებერვალში სხვადასხვა ქვეყანაში მიმდინარე ვაქცინაციის მონაცემებმა აჩვენა, რომ  ვაქცინა პირველი დოზის შემდეგ 72%-ით ეფექტიანია, ხოლო მეორე დოზის შემდეგ ეს მაჩვენებელი 82%-მდე იზრდება. როგორც ევროპის მედიკამენტების სააგენტო და ჯანდაცვის მსოფლიო ორგანიზაცია აცხადებენ, ამჟამად არ არსებობს მტკიცებულებები, რომ ვაქცინას სერიოზული და მძიმე გვერდითი ეფექტები ახლავს.

კონსპირაცია:  საქართველოში AstraZeneca-ს ვაქცინა 2 კვირით ადრე შემოვიდა, ხოლო ევროპის ქვეყნებმა ვაქცინაცია 2 კვირით შეაჩერეს, რათა მომდევნო ორი კვირის განმავლობაში საქართველოზე აწარმოონ დაკვირვება. 

AstraZeneca-ს ვაქცინის გამოყენების შეჩერებასთან დაკავშირებით ევროპის ხუთმა ქვეყანამ 11 მარტს განაცხადა, ხოლო  ხოლო 15 მარტს მათ რიგებს იტალიასთან ერთად გერმანია, საფრანგეთი და ესპანეთიც შეუერთდა. AstraZeneca-ს ვაქცინის შეჩერების მიზეზად ვაქცინაციის შემდეგ რამდენიმე პაციენტში სისხლის შედედების სახიფათო ნიშნების გამოვლენა დასახელდა. 13 მარტს საქართველომ კორონავირუსის ვაქცინის პირველი პარტია მიიღო, თუმცა მტკიცება, თითქოს ამისი მიზეზი ევროპის ქვეყნების მიერ საქართველოში ვაქცინის გვერდით მოვლენებზე დაკვირვება იყო, კონსპირაციაა და მტკიცებულებებს მოკლებულია.

მას შემდეგ, რაც ევროპის ქვეყნებმა AstraZeneca-ს ვაქცინის გამოყენება შეაჩერეს, გარდა ცალკეული ქვეყნების მარეგულირებელი ორგანოებისა, ვაქცინის უსაფრთხოების შესწავლა ევროპის მედიკამენტების სააგენტომაც (EMA) დაიწყო და 18 მარტს  საბოლოოდ დაასკვნა, რომ ვაქცინა სისხლის შედედების შემთხვევების რისკს არ ზრდის, უსაფრთხოა და მისი გამოყენება რეკომენდებულია. ვაქცინის უსაფრთხოებაზე დაკვირვების პროცესში EMA, სხვა შესაბამისო ორგანოების მსგავსად, არა საქართველოს ან რომელიმე კონკრეტული ქვეყნის ვაქცინაციის პროცესს, არამედ ვაქცინაციის შეჩერებამდე ევროპის მაშტაბით სისხლის შედედების უკვე დაფიქსირებულ შემთხვევებს იკვლევდა. EMA-ს დასკვნის საპასუხოდ,18 მარტიდან ევროპის რამდენიმე ქვეყანამ (გერმანია, იტალია, საფრანგეთი, ესპანეთი და ა.შ.), სადაც ვაქცინაცია დროებით შეჩერდა, AstraZeneca-ს გამოყენებას გააგრძელებენ.  ამასთანავე საფრანგეთში AstraZeneca-თი ვაქცინაცია მხოლოდ 55 წელს ზემოთ ასაკოვან მოსახლეობაში გაგრძელდება, ხოლო ჩრდილოეთ ევროპის სამმა ქვეყანამ – დანიამ, შვდეთმა და ნორვეგიამ AstraZeneca-ს შეჩერების გადაწყვეტილება 25 მარტამდე გაახანგრძლივეს, რათა ვაქცინის უსაფრთხოებაზე EMA-ს დასკვნას ადგილობრივმა მარეგულირებლებმა გადახედონ.  აღსანიშნავია ისიც, რომ ევროპის ზოგიერთ ქვეყანაში, მათ შორის დიდ ბრიტანეთში, ბელგიაში, პოლონეთში, ჩეხეთში და ა.შ., AstraZeneca-ს ვაქცინის გამოყენება საერთოდ არ შეწყვეტილა.

ვიდეოში გაჟღერებული სხვა მცდარი ინფორმაცია

ორსაათიან ვიდეოში ექიმებმა ვაქცინებისა და კორონავირუსის შესახებ ის მცდარი მტკიცებებიც გაიმეორეს, რომლებზეც “მითების დეტექტორი” ადრეც წერდა:

  1. ვაქცინები “ნიურნბერგის კოდექსის” პრინციპებს არ არღვევს. “ნიურნბერგის კოდექსი” არა ვაქცინაციას, არამედ ადამიანებზე ექსპერიმენტების ჩატარებას ეხება და  კოდექსის პირველი პრინციპი ნებაყოფლობითი თანხმობის აუცილებლობას უსვამს ხაზს.
    ვრცლად იხილეთ სტატია: AstraZeneca-ს ვაქცინა ნიურნბერგის კოდექსს არ არღვევს

  2. მტკიცება, თითქოს ინგლისში ვაქცინაციის დაწყებამდე კანონმდებლობა ისე შეცვალეს, რომ ვაქცინის გვერდით მოვლენებზე პასუხისმგებლობა არავის დაეკისროს, მცდარია. ბრიტანეთის მთავრობის გადაწყვეტილებით, COVID-19-ის ვაქცინებზე  “ვაქცინებით დაზარალებულთა კომპენსაციის სქემა” გავრცელდება, რომელიც სერიოზული გვერდითი ეფექტების გამოვლენის შემთხვევაში დაზარალებულებისთვის სახელმწიფოს მიერ კომპენსაციის გაცემას გულისხმობს.
    ვრცლად იხილეთ სტატია: ინფოდემია “ობიექტივის” ეთერში 

  3. სამხრეთ აფრიკას ინდოეთის “სერუმის ინსტიტუტისათვის” AstraZeneca-ს ვაქცინის ერთი მილიონი დოზა არ დაუბრუნებია. მას შემდეგ, რაც  AstraZeneca-ს ვაქცინამ ქვეყანაში ყველაზე გავრცელებული ე.წ. “სამხრეთ აფრიკული შტამის” წინააღმდეგ მინიმალური ეფექტიანობა აჩვენა, მთავრობის გადაწყვეტილებით შეძენილი დოზები აფრიკის სხვა სახელმწიფოებზე გადასანაწილებლად “აფრიკულ გაერთიანებას” შესთავაზა.
    ვრცლად იხილეთ სტატია: “სპუტნიკი”, “საქინფორმი” და News Front-ი AstraZeneca-ს წინააღმდეგ და Sputnik V-ის სადარაჯოზე

  4. არ არსებობს სამედიცინო და მეცნიერული მტკიცებულებები, რომ კორონავირუსის რნმ ვაქცინები ადამიანის ორგანიზმში ანტისხეულების სახიფათო რაოდენობის გამომუშავებას გამოიწვევს. მტკიცება, თითქოს კორონავირუსის რნმ ვაქცინების მიღების შემდეგ ადამიანებს ავტოიმუნური დაავადებები და “ანტისხეულებზე დამოკიდებული გაძლიერების” (ADE) სინდრომი დაემართებათ, დაუსაბუთებელია და ვაქცინებზე არსებული ემპირიული მონაცემებით არ დასტურდება.
    ვრცლად იხილეთ სტატიები: ინფოდემია “ობიექტივის” ეთერში
     Pfizer-სა და Moderna-ს გვერდითი ეფექტები იშვიათია, ხოლო რნმ ტექნოლოგია უსაფრთხოა

  5. ფრანგი ვირუსოლოგის ლუკ მონტანიეს მტკიცება, თითქოს კორონავირუსი მალარიისა და შიდსისი ვირუსების კომბინაციით ხელოვნურად შექმნეს, სამეცნიერო საზოგადოებამ მწვავედ გააკრიტიკა. კორონავირუსის გენომი არაერთხელ შეისწავლეს და მასში ხელოვნურად შექმნილი ვირუსებისათვის დამახასიათებელი ნიშნები ვერ აღმოაჩინეს. მენიერები თანხმდებიან, რომ კორონავირუსი ბუნებრივი გზით წარმოიშვა და ადამიანზე დიდი ალბათობით ღამურიდან გადავიდა.
    ვრცლად იხილეთ სტატიები: რატომ არ არის კორონავირუსი ლაბორატორიაში გამოყვანილი?
    ოპერაცია “ინფექცია 2”: KGB-ს შიდსის კონსპირაციიდან COVID-19-ს კონსპირაციამდე

  6. მცდარია მტკიცება, თითქოს კორონავირუსის ვაქცინა უარყოფითად მოქმედებს რეპროდუქციულ უნარზე, ამიტომ ვაქცინის მიღებამდე მამაკაცებს ურჩევენ სპერმა გაყინონ.
    ვრცლად იხილეთ სტატია: ანტივაქსერის დეზინფორმაცია და დაუსაბუთებელი მტკიცებულებები  “ობიექტივის” ეთერში

  7. მტკიცება, თითქოს FDA-სა და ჯანმოს მიერ კორონავირუსის ვაქცინებისათვის სტანდარტული ავტორიზაციის ნაცვლად, “გადაუდებელი საჭიროების ავტორიზაციის” მინიჭება იმის აღიარებაა, რომ ვაქცინები გამოცდილი არ არის, სიმართლეს არ შეესაბამება. როგორც FDA-მ, ისე ჯანმომ კორონავირუსის ვაქცინებს “გადაუდებელი საჭიროების ავტორიზაცია” კვლევის სამივე ფაზის დასრულების შემდეგ მიანიჭეს.
    ვრცლად იხილეთ სტატია: ინფორმაცია, თითქოს FDA-ის Pfizer-ის ვაქცინა არ დაუმტკიცებია, მცდარია


პოსტის არქივის ბმული: https://archive.is/ddOW8


სტატია Facebook-ის ფაქტების გადამოწმების პროგრამის ფარგლებში მომზადდა.  მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.

იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.

დარღვევის ტიპი: დეზინფორმაცია
ქვეყანა/ორგანიზაცია: იაპონია, იტალია
წყარო

ბოლო სიახლეები

Welcome Back!

Login to your account below

Retrieve your password

Please enter your username or email address to reset your password.

Add New Playlist