2020 წლის 22 ოქტომბერს გვერდმა “ყოველდღიური მოვლენები” საქართველოს პრეზიდენტის სალომე ზურაბიშვილის შემდეგი ციტატა გამოაქვეყნა: “ეს არის საშვილოსნო საქმე, რომელიც ბატონმა ბიძინა ივანიშვილმა გააკეთა”. პოსტის თანახმად, ეს სიტყვები საქართველოს პრეზიდენტმა ქუთაისის საერთაშორისო უნივერსიტეტის გახსნის ცერემონიაზე წარმოთქვა. პოსტს ერთვოდა სალომე ზურაბიშვილის ფოტო, თუმცა არ ახლდა პრეზიდენტის სიტყვით გამოსვლის ამსახველი ვიდეო ან სხვა წყარო, რაც ციტატის ავთენტურობის გადამოწმებას შესაძლებელს გახდიდა.
2020 წლის 25 ოქტომბერს გვერდმა სალომე ზურაბიშვილის აღნიშნულ ციტატასთან დაკავშირებით გამოაქვეყნა მეორე პოსტიც, რომელშიც მის ფოტოსურათს დართული ჰქონდა 22 ოქტომბრის პოსტზე ერთ-ერთი მომხმარებლის დამცინავი კომენტარის სქრინი, შემდეგი ტექსტით: “კიდეკაი საკვერცხედ არ მოიხსენია ერის მამა”.
“ყოველდღიური მოვლენების” მიერ გამოქვეყნებული ციტატა მანიპულაციაა. მართალია, საქართველოს პრეზიდენტმა სიტყვის წარმოთქმისას შეცდომა დაუშვა და სიტყვა “საშვილიშვილოს” ნაცვლად “საშვილოშვილო” თქვა, თუმცა ზუბარიშვილს სიტყვა “საშვილოსნო” არ უთქვამს. “ყოველდღიური მოვლენების მიერ” გამოქვეყნებული პოსტი მიზანმიმართულად ახდენს ციტატის დამახინჯებას საზოგადოების შეცდომაში შეყვანის მიზნით, რასაც მის მიმართ შეურაცხმყოფელი და დამცინავი რეპლიკები მოჰყვა.
სალომე ზურაბიშვილი ქუთაისის საერთაშორისო უნივერსიტეტის გახსნაზე სიტყვით 21 ოქტომბერს გამოვიდა. პრეზიდენტის გამოსვლა არაერთმა მედია საშუალებამ გააშუქა. გამოსვლის ბოლო ნაწილი პრეზიდენტმა ივანიშვილების ოჯახისათვის მადლობის გადახდას დაუთმო, გამოსვლის ამსახველ ვიდეომასალაში მკაფიოდ ჩანს, რომ პრეზიდენტი ამბობს “საშვილოშვილოს” და არა “საშვილოსნოს”.
სალომე ზურაბიშვილი: “მინდა, მადლობა მოვახსენო ივანიშვილების ოჯახს გაწეული ქველმოქმედებისთვის, ფონდ „ქართუსა“ და ყველა იმ ადამიანს, ვინც მონაწილეობა მიიღო ამ საშვილოშვილო საქმეში.”
პოსტის გავრცელება სოციალურ ქსელში
25 ოქტომბრის მონაცემებით “ყოველდღიური მოვლენების” მიერ 22 ოქტომბერს გამოქვეყნებულ პოსტს 77 გაზიარება და 120 კომენტარი აქვს, ხოლო 25 ოქტომბრის პოსტს 12 გაზიარება და 20 კომენტარი.
“ყოველდღიური მოვლენების” 22 ოქტომბრის პოსტი სიქნრონულად, 23 ოქტომბრის ღამის 2 საათსა და 35 წუთზე ხუთმა ოპოზიციურმა გვერდმა გააზიარა, რომელთა უმეტესობა ნაციონალურ მოძრაობასთანაა დაკავშირებული. ესენია: “ქვეყნის არაფორმალური მმართველი”, Annual events ყოველწლიური მოვლენები, ლურჯი ვირი, What the fuck is that და თავისუფალი აზრი.
“ყოველდღიური მოვლენების” შესახებ
გვერდი “ყოველდღიური მოვლენები” 2018 წლის 18 ივლისს, 2018 წლის საპრეზიდენტო არჩევნებამდე რამდენიმე თვით ადრე შეიქმნა. გვერდს 51 000-ზე მეტი გამომწერი ჰყავს და მას ამჟამად 9 ადმნისტრატორი მართავს. გვერდი აქტიურადაა ჩართული 2020 წლის საარჩევნო კამპანიაში და იგი ძირითადად “ერთიანი ნაციონალური მოძრაობის” მხარდამჭერ პოსტებს, ასევე ოპოზიციონერი პოლიტიკოსების საჯარო გამოსვლების ვიდეოებს, საარჩევნო რეკლამებს და ოპოზიციურად განწყობილი ტელევიზიების პირდაპირ ეთერებს აზიარებს.
