პოლიტიკა

“ობიექტივის” წამყვანი რუსეთის მხრიდან საქართველოს ანექსიას უარყოფს

20 ივლისი, 2017

2017 წლის 13 ივლისს ტელეკომპანია “ობიექტივის” ეთერში გადაცემის წამყვანმა ბონდო მძინარაშვილმა განაცხადა, რომ რუსეთი არა საქართველოს ანექსიას, არამედ საბჭოთა კავშირის დროს “სამხრეთ ოსეთის ადმინისტრაციული ოლქის” საზღვრების აღდგენას ცდილობს.

ბონდო მძინარაშვილი, წამყვანი: „არავითარი ღამის და მცოცავი [ანექსია]არ არსებობს, მე მინდა, რომ ჩვენ ეს კარგად გავიგოთ. [მიხეილ] სააკაშვილმა აღადგინა სამხრეთ ოსეთი ავტონომიურ საზღვრებში. კანონით აღადგინა ის ტერიტორია ისევ, რაც იყო საბჭოთა კავშირის დროს საქართველოს საბჭოთა სოციალისტური რესპუბლიკის შემადგენლობაში, სამხრეთ ოსეთის ავტონომიური ოლქი, ის საზღვრები აღადგინა... რუსებს აქვთ რუკები 1936 წლის და 1964 წლის, როგორც არსებობდა სამხრეთ ოსეთის ავტონომიური ოლქი. ამ საზღვრებს მიყვებიან, სადაც იყო ოლქის საზღვარი, იქ ავლებენ მავთულხლართებს. გადმოწიეს-გადაწიეს - ეს არის ზღაპრები!.. დანარჩენი არის ტუტუცური პროპაგანდა“.

ბონდო მძინარაშვილის განცხადება სიცრუეა, რადგან რუსეთი იმ ტერიტორიების ანექსიას ახდენს, რომლებიც საბჭოთა კავშირის პერიოდშიც საქართველოს შემადგენლობაში შედიოდა.

სამხრეთ ოსეთის ავტონომიური ოლქი 1922 წელს 20 აპრილს საქართველოს საბჭოთა სოციალისტური რესპუბლიკის ფარგლებში შეიქმნა და 1991 წლის 11 დეკემბრამდე იარსება.

საქართველოს კონსტიტუციით საქართველოს სახელმწიფოს ტერიტორია განსაზღვრულია 1991 წლის 21 დეკემბრის მდგომარეობით, რაც იმას ნიშნავს, რომ რუსეთის მიერ სამხრეთ ოსეთის დამოუკიდებელ სახელმწიფოდ აღიარება, საქართველოს ტერიტორიული მთლიანობისა და სუვერენიტეტის დარღვევაა.

  • 1921 წლის კონსტიტუციის მიხედვით, ავტონომიური მმართველობა შიდა ქართლის ოსებით კომპაქტურად დასახლებულ ნაწილებში გათვალისწინებული არ ყოფილა, თუმცა ოსებს ეროვნულ საბჭოში წარმომადგენლის ყოლის უფლება ჰქონდათ. საქართველი პირველი რესპუბლიკის დროს ძალაში დარჩა რუსეთის იმპერიის მიერ საქართველოს ტერიტორიული დაყოფის სისტემა - ოსებით დასახლებული შიდა ქართლის ტერიტორია გორის მაზრაში, შესაბამისად თბილისის გუბერნიაში შედიოდა.
  • 1921 წელს სსრკ-ს მიერ საქართველოს ანექსიის შემდეგ საბჭოთა ხელისუფლებამ საქართველოს ტერიტორიული მოწყობის სისტემა შეცვალა. 1922 წლის 20 აპრილს მიღებული დეკრეტით, საქართველოს საბჭოთა სოციალისტური რესპუბლიკის ფარგლებში შეიქმნა სამხრეთ ოსეთის ავტონომიური ოლქი.
"

საქართველოს საბჭოთა სოციალუსტური რესპუბლიკის 1939 წლის რუკა

1990 წელს, რუსეთის წახალისებით, სეპარატისტულმა ძალებმა სამხრეთ ოსეთის დამოუკიდებლობა გამოაცხადეს. 1990 წლის 20 სექტემბერს სამხრეთ ოსეთის ავტონომიური ოლქის სახალხო დეპუტატთა საოლქო საბჭოს გადაწყვეტილებით, სამხრეთ ოსეთის ავტონომიური ოლქი სამხრეთ ოსეთის საბჭოთა დემოკრატიულ რესპუბლიკად გარდაიქმნა. დეპუტატებმა საბჭოთა კავშირის უმაღლეს საბჭოს მიმართეს თხოვნით, რომ სამხრეთ ოსეთი საბჭოთა კავშირის შემადგენლობაში დამოუკიდებელი საბჭოთა რესპუბლიკის სტატუსით შესულიყო.

  • აღნიშნულის საპასუხოდ საქართველოს რესპუბლიკის უზენაესი საბჭოს 1990 წლის  11 დეკემბრის დადგენილებით სამხრეთ ოსეთის ავტონომიური ოლქის სტატუსი გაუქმდა. დაპირისპირება საქართველოს ხელისუფლებასა და სეპარატისტებს შორის საომარ მოქმედებებში გადაიზარდა.
  • 1992 წელს შეიარაღებული კონფლიქტის დასრულების შემდეგ რუსეთის ე.წ. სამშვიდობო ძალებმა და ოსმა სეპარატისტებმა დაიკავეს ცხინვალის რაიონის ძირითადი ნაწილი, ჯავის რაიონი და ზნაურის რაიონი.
  • 2008 წელს რუსეთ-საქართველოს აგვისტოს ომის შედეგად საქართველომ კონტროლი დაკარგა ცხინვალის რაიონის 135 დასახლებულ პუნქტზე, რომელთა უმეტესობა ქართულ-ოსური იყო. მხოლოდ ქართველებით დასახლებული სოფლები თითქმის სრულად განადგურებულია.
"

წყარო: ინფორმაციის თავისუფლებისა და განვითარების ინსტიტუტი (IDFI)

                                     ვიდეოში გამოყენებულია დავით ბერიტაშვილის მასალა

მოამზადა დეა მაღალაშვილმა
“მითების დეტექტორის” ლაბორატორია

პროფილები: